Што велат експертите за пресот на Путин

Претседателот на Русија Владимир Путин.

Претседателот на Русија Владимир Путин.

EPA
Годишната прес-конференција на претседателот на Руската Федерација Владимир Путин го привлече вниманието како на руската, така и на светската јавност. Во текот на повеќе од три часа рускиот претседател одговараше на прашањата на новинарите и успеа да зборува за сите актуелни теми. „Руска реч на македонски“ ви предлага да го проследите мислењето на руските експерти во врска со прес-конференцијата на Путин.

Михаил Коростиков, политиколог, раководител на одделението за стратешки развој при Московскиот државен универзитет за економија

Конференцијата мина во мирна и релаксирана атмосфера, како што беше и обраќањето на Путин пред Федералното собрание од почетокот на месецов. Немаше никакви нови пресврти. Кажано беше она што и претходно беше познато. Но, мислам дека Путин успеа да ја охрабри и да ја утешни домашната публика. Во руското општество се имаат насобрано премногу прашања поврзани со системот „Платон“ (систем за наплата на патна такса од автопревозниците), со станбено-комуналната сфера и со економијата.

Владимир Путин уште еднаш кажа: „луѓе, сè е во ред, не грижете се“, но не се добива впечаток дека овој пат тоа е прифатено. Зборовите на шефот на државата се важни, но постојат и објективни појави кои ги удираат луѓето по џебот. Претседателот чесно призна дека буџетот е формиран врз основа на поинакви цени на нафтата од оние што ги гледаме сега. Но, не одговори на прашањето што да прават оние што се најдоа неподготвени. Јасно е дека економијата и понатаму ќе паѓа доколку цената на барелот продолжи да оди надолу.

Во поглед на Турција сè е јасно. Тука Путин само го повтори претходно изнесениот став. За волја на вистината, вознемирувачки звучат зборовите на претседателот за тоа дека ќе биде тешко да се обноват општествените и културните врски со Турција. Ова не е сосема јасен став. Зошто граѓаните на Турција треба да страдаат поради потезите на нивното раководство?

Леонид Пољаков, шеф на Катедрата за општа политикологија при Националниот истражувачки универзитета Висока школа за економија

Претседателот разговараше со новинарите во стил кој му е својствен нему. Како и секогаш беше мошне добро информиран. Се доби впечаток дека е подготвен за секое прашање и дека му е важно да одговори мошне исцрпно.

На пример, за граѓаните на Русија е мошне болно прашањето за протестите на автопревозниците. Оваа тема повеќе не е чисто економска, таа веќе предизвикува напрегнатост во целото руско општество. На Путин му беше мошне важно да покаже дека е упатен во оваа ситуација до детали, и дека Владата на Руската Федерација не е збунета, ами дека веќе има конкретни предлози.

Кога станува збор за најострите меѓународни прашања, ставот на Путин е прилично конструктивен и отворен. Во врска со ситуацијата со Турција, тој направи јасна разлика помеѓу односите кон турското раководство и кон турските бизнис-кругови. И покрај безумната постапка на раководството на Турција, Русија е подготвена да ги продолжи економските односи и големите инвестициски проекти, односно изградбата на нуклеарната електрана и гасоводот Турски тек.

Исто толку беше одмерен и неговиот одговор на прашањето за Минскиот мировен процес. Претседателот на Русија се повика на конкретни одредби од меморандумот од Минск и покажа дека Киев формално демонстрира некакви чекори, но реално всушност го кочи целиот процес.

Сите права ги задржува „Росијскаја Газета“.