Не пропуштајте!
Придружете се на Russia Beyond на Телеграм за повеќе есклузивни содржини
Можете да најдете стан на интернет или преку агенција за недвижности.
Првата опција е прилично едноставна - инсталирате апликација, барате тип на стан што ви одговара, контактирате со сопственикот и вршите упката. Најпопуларните онлајн сервиси во Русија се CIAN, Avito и „Яндекс.Недвижимость“. Со нив можете да најдете стан дури и пред да пристигнете во земјата.
На овој начин ги избегнувате посредниците и директно контактирате со сопственикот на станот (само користете ги филтрите). На овој начин ќе заштедите на плаќање на услугите на агентот за недвижности, но затоа сите фази на подготовка мора да ги направите сами.
Друга платформа за рекламирање се социјалните мрежи. Многу градови имаат на социјалните мрежи групи за изнајмување станови. На пример, за Москва тоа е онлајн заедница Flats for friends (тука можете да објавите оглас и да собирате одговори од сопствениците), а за Санкт Петербург тоа е „Стопагент“ (каде што огласите ги поставуваат самите сопственици).
Опцијата со агентите за недвижности е поскапа и малку посложена, бидејќи мора да бидете во Русија. Меѓутоа, тука целата работа околу барањето стан за вас ја врши посредникот, се разбира, за пристојна провизија. Секоја агенција има свои цени, но често услугите на посредник чинат колку една месечна кирија.
Најдовте соодветна опција и сега размислувате да изнајмите стан на подолг период. Цената ви одговара и подготвени сте да контактирате со сопственикот. Меѓутоа, може да се случи цената во огласот да не биде конечна.
Некои закуподавачи ги наведуваат само трошоците за изнајмување стан, кои не ги вклучуваат сметките за комунални услуги (струја, вода, греење и одржување), интернет или телевизија. Кога ќе се сретнете со сопственикот, разјаснете што е вклучено во цената на закупот и за што ќе треба дополнително да платите.
Сметки за комунални услуги
Алексеј Сухоруков/SputnikТрошоците за сметки за комунални услуги обично варираат помеѓу 2000 и 6000 рубли (20-60 евра) месечно и, поради греењето, може да варираат во зависност од годишното време. Грејната сезона започнува во октомври и завршува во април. Многу станбени згради во Русија имаат централно греење, така што парното во секој случај ќе мора да го платите, бидејќи не можете да го исклучите или вклучите кога сакате.
За изнајмување на подолг период е задолжителен договор кој ги штити вашите права, како и правата на сопственикот. Во договорот задолжително наведете ја моменталната адреса, како и што точно изнајмувате: ако се работи за стан, тогаш во договорот треба да пишува - „стан“, а не „станбена просторија“ („жилое помещение“) или „станбен простор („жилое пространство“).
Во договорот задолжително наведете ја цената на станот, висината на депозитот (повеќе за тоа подолу), периодот на закуп, одговорностите на двете страни, посетите (колку често сопственикот може да провери како изгледа станот и како далеку однапред треба да информира за неговата посета).
Доколку во договорот не го наведете рокот за закуп, тогаш се смета дека договорот е потпишан на 5 години.
Во Русија, исто така, постои практика да се потпишуваат договори за изнајмување стан на 11 месеци, а не на една година. Наводно, тоа му овозможува на сопственикот да не ѝ плати на државата данок на изнајмување. Всушност, вистината е дека договорот за закуп мора да биде регистриран во Даночната служба доколку закупецот е правно, а не физичко лице. Меѓутоа, не сите сопственици навлегуваат во детали и претпочитаат да се „заштитат“ од евентуални парични казни со договор на 11 месеци.
Веднаш по потпишувањето на договорот, може да биде побарано да уплатите депозит (еден вид гаранција). Оваа сума се плаќа еднаш како гаранција дека и вие и сопственикот на станот ќе ги почитувате условите од договорот. На пример, ако го оштетите имотот на сопственикот, вашиот депозит ќе биде искористен за замена на оштетената ствар. Според законот, депозитот мора да ви биде вратен кога ќе го напуштите станот, доколку не сте ги прекршиле правилата за престој во него. Износот на депозитот го одредува самиот сопственик. Тоа може да биде 20% од месечната кирија, но и 200% (што е исто така вообичаено).
Меѓутоа, ако депозитот е преголем и изнесува 5 или 6 месечни кирии, тогаш разјаснете ги конкретните причини за толку големата сума, а исто така повнимателно прочитајте го договорот бидејќи тоа мора да биде наведено во него.
Ова е многу важен документ што се составува заедно со договорот при вселувањето, а потоа и при иселувањето. Тој претставува список на сè што се наоѓа во станот: мебелот, апаратите и постоечките оштетувања и ве штити од незаконски побарувања, доколку при иселувањето дојде до конфликт со сопственикот.
Најважно е како странски државјанин да добиете привремена или постојана регистрација во вашето место на престој, односно на адресата на која сакате да изнајмите стан. Сопственикот на станот е должен да ве пријави, но не секој е подготвен да пријави странец во својот стан, дури и ако тоа е привремено. Ако сопственикот се согласи, тогаш мора да ја имате целата потребна документација: пасош, известување за пристигнување, виза и миграциска карта. Регистрацијата е потполно бесплатна и ќе биде готова во рок од еден работен ден.
Полесно е да се изнајми стан на пократок период. Тоа може да се направи преку сајтови за краткорочно изнајмување на станови. Меѓу нив, најпопуларен е Ostrovok (Booking и Airbnb не работат во Русија). Ако регистрацијата ја извршите преку сајт, тогаш не треба да составувате договор за закуп.
Краткорочно сместување може да се најде и преку онлајн-сервисите услугите CIAN, Avito и „Яндекс.Недвижимость“ (во филтерот изберете „стан на ден“). Од вас зависи дали ќе составите договор или не. Во повеќето случаи сопственикот однапред ја бара целата сума за целиот период на престој, но вие не ги плаќате сметките за комуналии, интернет или телевизија. Во повеќето случаи, не се плаќа ни депозит.
Кога барате стан преку интернет, внимателно проучете ги сите огласи. Тие треба да ги содржат сите основни податоци за станбениот простор: износот на киријата, периодот на издавање, список на уреди во станот, како и фотографии од станот (подобро е да има повеќе). Треба да погледнете и пред колку време е ставен огласот, бидејќи ако станот од огласот подолго време не е издаван, тука можеби нешто не е во ред.
Исто така, постои и веројатност да налетате на измамници, па затоа подготвивме мала листа на показатели по кои можете да ги препознаете:
1. Невообичаено ниска цена. Ако цената на закупот се разликува од просечната за 20% или повеќе, а нема видливи недостатоци во станбениот простор, тогаш подобро е да бидете внимателни, бидејќи може да има недостатоци кои подоцна ќе ги откриете.
2. Преголем износ на првата рата. Првата рата не би требало да ја надминува цената на киријата за 2 месеци, во спротивно постои ризик закупецот да биде избркан против негова волја и да му биде вратен само дел од депозитот, наводно поради нанесена штета.
3. Барање да го испратите вашиот пасош или банкарските податоци пред да го видите станот. Постои голем ризик вашите лични податоци да бидат искористени за незаконски цели.
4. Молба да го оставите пасошот како гаранција. Никогаш не ги давајте личните документи како гаранција бидејќи тоа е противзаконски.
5. Плаќање однапред, пред да го видите станот. Вообичаено, како изговор за авансно плаќање ви наведуваат дека веќе има многу заинтересирани токму за тој стан, а ако платите однапред можете веднаш да се вселите. Не верувајте во тоа. Секоја сума при изнајмување стан мора да биде наведена во договорот, а пред да го погледнете не треба да платите ништо, бидејќи ако платите може да се случи лажниот наемодавач да исчезне со вашите пари.
6. Сопственикот одбива да ги покаже документите за станот. Тоа значи дека тој не може да ги потврди своите права на издавање на станот, што подоцна би можело да им направи проблеми на станарите.
7. Сопственикот не сака да склучува договор. Чесниот сопственик никогаш нема да предложи да му верувате на збор или да склучите устен договор, бидејќи за него тој документ е гаранција дека редовно ќе му плаќате, а во случај на конфликт со закупецот, тој ги штити своите права врз основа на договорот.
При користење на материјалите на Russia Beyond задолжителен е хиперлинк до изворот од кој е преземен материјалот.
Претплатете се
на нашиот билтен!
Добивајте ги најдобрите стории на неделата директно во вашето сандаче