„Вооружувањето со системи „Сармат“ ќе биде рентабилно, што е реткост кога станува збор за воведување ново оружје. Оваа интерконтинентална ракета ќе биде базирана во веќе постоечките ракетни силоси со минимална доработка на инфраструктура“, рече сенаторот. Тој истакна дека засега е прерано да се зборува за сериско производство на новата интерконтинентална балистичка ракета, бидејќи вооружувањето со овој систем е предвидено за периодот 2018-2027 година, пренесува порталот rg.ru.
Претседателот на Русија Владимир Путин го најави почетокот на активната фаза на тестирањето на „Сармат“. Оваа ракета во рускиот арсенал ќе ја замени тешката интерконтинентална балистичка ракета „Воевода“ од советско производство и ќе има хиперсонични термонуклеарни боеви глави со голема моќ.
Стратешката интерконтинентална ракета од петта генерација „Сармат“ е единственото оружје на светот кое може да стигне до секоја точка на земјината топка со траекторија која не е оптимална (т.е. која противникот не ја очекува). Погонот на ракетата тешка 200 тони е таков што ѝ овозможува „лет преку Северниот и Јужниот пол“, рече претходно за оружјето Јуриј Борисов, заменик-министер за одбрана на Русија.
„Тоа е многу сериозно оружје и на многумина навистина им влева страв“, додаде Борисов.
Ракетата е долга 30 метри, носи кон целта повеќе од 10 боеви глави од кои секоја може да има сила до еден мегатон. Според оцените на западните експерти, една интерконтинентална балистичка ракета е доволна да се срамни со земја една помала држава.
Првите системи „Сармат“ ќе ги добијат единиците на стратешките ракетни сили кај Оренбург и Краснојарск. Таму за нив веќе се подготвуваат ракетни силоси.