Министерот за енергетика и природни ресурси на Турција Али Риза Алабојун изјави дека рускиот гас преку двата крака на „Турски тек“ ќе почне да пристига во Турција и да се извезува преку неа во Европа во 2021 година место планираната 2019 година.
Според неговите зборови, „потребно е најпрвин да се поврзе гасоводот со внатрешниот турски гасен систем и да ѝ се дозволи на Анкара да се занимава со реекспорт на гасот“, пренесува „Взгљад”.
Компанијата „Гаспром” планираше по 2019 година да престане со трансфер на гасот преку Украина, и затоа гасоводите „Северен тек-2” и „Турски тек” беа најавени како можност за заобиколување на несигурниот партнер.
Турција повеќепати соопшти дека е подготвена да учествува во гасоводот „Турски тек“ само под услов да ѝ се одобри да го препродава рускиот гас на европскиот пазар. Русија, меѓутоа, е против реекспорт на гасот.
„Турција сака да биде препродавач на рускиот гас, што е апсолутно неприфатливо. Тоа од нас го бараше и Украина: да ѝ го продаваме на граница рускиот гас, а таа потоа да го испорачува во Европа. Тоа е во спротивност со европските принципи за трговија со гас. ЕУ се бори против посредници и препродавачи“, изјави директорот на Фондот за национална енергетска безбедност Константин Симонов.
Турција исто така бара посебен попуст на цената на рускиот гас од најмалку 10,25%. Поради тоа турските власти поднесоа тужба против „Гаспром“ до меѓународниот суд за арбитража во Стокхолм.
Сите права ги задржува „Росијскаја Газета“.