„Си-Ен-Ен“ за парадата: Оваа година Кремљ се надмина самиот себеси

Дописникот на „Си-Ен-Ен“ ја нарече парадата на Победата импресивна, додавајќи дека на тој начин Русија им ја демонстрирала на западните лидери својата воена моќ, како и тоа дека има влијателни пријатели.

Јубилејната воена парада, посветена на 70-годишнината од Победата во Великата Татковинска војна,  стана не само знак на оддавање почит на минатото, туку и демонстрација на сегашната воена моќ на Русија, соопштува „Си-Ен-ЕН“.

„Кремљ отсекогаш умеел да организира спектакуларни воени паради, но оваа година се надмина себеси. На Црвениот плоштад маршираа над 16 илјади војници – импресивна глетка!“, истакна дописникот на телевизијата Метју Чанс.

Секоја парада на Победата за Русија е можност „да ги покаже воените мускули“ и оваа година не беше исклучок, пишува новинарот.

Така, на публиката првин ѝ беше покажан новиот високотехнолошки руски тенк Т-14 кој доби оценка како крајно ефикасно оружје. Кремљ исто така не пропушти можност да го покаже својот нуклеарен арсенал.

Сега, кога меѓу Русија и Западот се затегнаа односите, тие интерконтинентални балистички ракети станаа недвосмислено потсетување за тоа со каква деструктивна моќ располага Москва, истакнува „Си-Ен-Ен“.  

„Ова е знак за непокорот на Русија, знак дека обидите на Западот да ја игнорира Русија  нема да успеат. Русија е силна и има влијателни пријатели“,  истакнува воениот аналитичар Павел Фелгенгауер.

Според неговото мислење, грандиозната парада беше наменета за Москва во својство на порака: Русија повторно е голема воена суперсила.

Сите права ги задржува „Росијскаја Газета“.