„Фајненшел Тајмс“: Никој не треба да ја заборави улогата на советскиот народ во победата над фашизмот

Британскиот весник „Фајненшел Тајмс“ пишува дека значењето на улогата на СССР во Втората светска војна не смее да се минимизира.

Британскиот весник „Фајненшел Тајмс“ пишува дека годинава Денот на победата над нацистичка Германија треба да биде посебен: на светов остануваат сѐ помалку учесници во Втората светска и Великата Татковинска војна, како и луѓе кои ги снашло тоа мачно време. Притоа свеченостите во чест на 70-годишнината од Победата ќе бидат донекаде засенети од тешката политичка ситуација во Европа.

Како што потсетува изданието, пред 10 години, на денот на 60-годишнината од поразот на Третиот рајх, претседателот на РФ Владимир Путин ја прими парадата на Победата на Црвениот плоштад во опкружување на голем број светски лидери. Чест на паднатите војници-ослободители им оддадоа претседателите на САД и Франција, како и канцеларот на Германија.

Оваа година шефовите на западните земји одбија да допатуваат во рускиот главен град. Како причина за таквата одлука ја наведуваат ситуацијата на истокот на Украина. ЕУ и САД сметаат дека руската страна учествува во внатреукраинскиот конфликт. Освен тоа, Западот не ги признава резултатите од референдумот во Крим и неговото присоединување кон РФ.

Сепак, како што пишува изданието, „секој од западните лидери којшто ја разбира големината на улогата на СССР во поразувањето на нацистите, а кој се откажал од учество во свеченостите кои ќе се одржат на денот на 70-годшнината од Победата во Москва, треба да жали за својата одлука“.

„Фајненшел Тајмс“ потсетува дека во текот на Втората светска војна на бојните полиња и во окупираните зони загинале над 20 милиони советски граѓани.  А за време на блокадата на Ленинград загинале повеќе луѓе отколку што изнесуваат вкупните загуби на Велика Британија и Соединетите Американски Држави во текот на целата војна. „Сталинградската и Курската битка станаа пресвртни моменти во целата Втора светска војна. И улогата на Русија во борбата со фашизмот беше централна и извонредно важна. Тоа никогаш не смее да се заборави“, потенцира весникот.

Празникот на 70-годишнината од Победата би требало да биде момент на обединување на целиот свет, како и знак дека најтешката лекција, извлечена од најголемиот конфликт во историјата на човештвото, е научена.

Читателите на сајтот на „Фаненшел Тајмс“ искажаа мислење дека никаква политичка ситуација не треба да ја засени улогата на СССР и советскиот народ во борбата со германско-фашистичките агресори. Еден од нив пишува: „Невозможно е да се сфати отсуството на западните лидери. Ако не беше СССР, сите ние ќе зборувавме германски“. 

Сите права ги задржува „Росијскаја Газета“.