„Калашников“ ќе произведува беспилотни летала

Концернот „Калашников“ планира да започне со производство на разузнавачки беспилотни летала од различен тип, пренесува „Лента.ру“.

Концернот „Калашников“, кој е дел од државната корпорација „Ростех“, се договори за купување на контролниот пакет (51 процент) акции на рускиот дизајнер и производител на беспилотни летала ZALA Aero, соопштува „Лента.ру“ од изложбата IDEX-2015. Концернот планира да започне во Русија со производство на разузнавачки беспилотни летала од различен тип.

„Врз база на концернот „Калашников“ и компанијата Zala Aero планираме да дизајнираме и произведуваме беспилотни летала, како и мобилни и надземни станици за управување, истакна генералниот директор на претпријатието за производство на оружје Алексеј Криворучко. – Основни производи ќе бидат беспилотните авиони, хеликоптери и аеростати“. Раководителот на „Калашников“ соопшти дека одлуката за купување на пакетот акции на ZALA Aero е донесена во рамките на стратегијата за развој на концернот до 2020 година.

Беспилотните летала ќе се користат за различни воени, цивилни и специјални задачи, вклучувајќи мониторинг на особено опасни објекти и истражувачки работи.

Изложбата IDEX-2015 се отвора денес, 22 февруари, во Абу Даби.

Изложбата се одржува во Обединетите Арапски Емирати на секои две години, почнувајќи од 1993 година. Таа е под патронат на владата и претставува една од најпретставителните меѓународни изложби на вооружување. Вкупниот износ на договорите кои се склучуваат во текот на манифестацијата изнесува стотици милиони долари. 

Сите права ги задржува „Росијскаја Газета“.

Повеќе возбудливи стории и видеа на Фејсбук страницата на Russia Beyond-Македонија