Кратко резиме на романот „Браќа Карамазови“ од Фјодор Достоевски

Russia Beyond (Константин Шапиро/ Public Domain; Getty Images; „Эксмо“/ Pocket book, 2021)
Овој роман е полн со психолошка и религиозна контемплација, но истовремено е и неверојатно возбудлива детективска приказна! Ако некој сака да остави впечаток на образована и начитана личност, треба да биде запознаен со содржината и смислата на оваа книга.
Фјодор Карамазов има три сина, но тие никогаш не биле во добри односи. Еден е осомничен за убиството на таткото поради жена и пари... Може ли да се дознае кој и зошто го убил Фјодор Павлович?

Дмитриј, Иван и Алексеј се синови на Фјодор Карамазов, похотен и циничен провинциски спахија. Сите тројца имаат сосема различен карактер и поглед на светот.

„Браќа Карамазови“, 1968.

Најмладиот син Алексеј на 20-годишна возраст веќе се подготвува да се замонаши. Тој е човек што верува и сето свое време го поминува во блискиот манастир со стариот и мудар монах Зосима. Средниот син Иван е научник, филозоф и скептик со прилично ладен ум. Постојано се бори со своите мисли, обидувајќи се да разбере дали постои Бог или нема, и постои ли душата или не... И секогаш се расправа со Алексеј за верски прашања.

И Алексеј и Иван се загрижени за односот на нивниот татко спрема нивниот постар брат. Дмитриј, најстариот син од првиот брак на Фјодор, никогаш не почувствувал таткова љубов и внимание, а да не зборуваме за татковите пари. Тој се преселил кај своите роднини уште кога бил многу мал и подоцна не се гледал често со татка си. Дмитриј е чувствителен, импулсивен и страстен човек (според темпераментот во суштина најмногу личи на татка си). Романот започнува така што Дмитриј бара од својот татко пари и дел од наследството и го обвинува дека не учествувал во воспитувањето на Дмитриј. Но, Фјодор нема намера да му даде ништо. Нивните и онака лоши односи дополнително се усложнуваат со тоа што и двајцата сакаат иста жена - Грушенка... А таа? Таа флертува со двајцата.

„Браќа Карамазови“, 1968.

Дмитриј очајно ја следи Грушенка и се обидува да ги затекне неа и нејзиниот татко кога се заедно. Иван дури се плаши дека Дмитриј може и да го убие татка си заради пари и жена. Една ноќ, додека Дмитриј и Грушенка бурно се забавуваат во крчма, доаѓаат жандарми и соопштуваат дека татко му е убиен. Дмитриј е уапсен како главниот осомничен.

Вистинскиот убиец, сепак, му го открива своето злодело на Иван. Убиецот, судејќи според сé, е Смердјаков, лакејот на убиениот Фјодор Павлович. Тој е истовремено и негов таен син, кого на Фјодор му го родила селанка од неговиот имот. Тој вели дека на убиство го поттикнале размислувањата на Иван, бидејќи ако нема Бог, тогаш нема морал и сé е дозволено. Од друга страна, Смердјаков има алиби, бидејќи во моментот на убиството се правел дека има епилептичен напад. На крајот, убиецот не може да го поднесе сето тоа и се самоубива.

„Браќа Карамазови“, 1968.

На крајот од романот детално е опишано судењето на Дмитриј Карамазов. Иван на суд го изнесува случајот со Смердјаков, но на крајот од таа приказна добива напад на хистерија и затоа никој не му верува. Сите мислат дека тој само се обидува да го спаси својот брат. Во меѓувреме, обвинителот ги изнесува своите обвинувања, а познат адвокат својата одбрана. И конечно, поротата го прогласува за виновен невиниот Дмитриј, а судот му изрекува казна затвор.

Која е подлабоката смисла на романот?

Театарската претстава „Браќа Карамазови“ според романот во режија на Лев Додин на сцената на Московскиот академски театар „Владимир Мајаковски“.

Достоевски го позајмил заплетот од реалниот живот, т.е. од вест за злосторство што ја прочитал во весник. Но, тоа е само детективската линија на романот, додека неговата смисла е многу подлабока. Последното дело на Фјодор Достоевски е квинтесенција на неговите размислувања за природата на љубовта, гревот, Бога и моралот. Романот има исклучително психолошка содржина (Достоевски е инаку пионер на психолошкиот пристап во руската литература). Тој се обидува да ја разбере руската душа и ги анализира мислите и однесувањето на ликовите. Зошто се однесуваат така? Што ги тера да ги направат сите свои гревови? Тоа се прашањата што го мачат големиот писател.

Ликот по име Зосима е стар монах кој им дава мудри совети на верниците и живее совршен христијански живот во голема духовна дисциплина и молитва. Прототип на старецот Зосима е свети Амвросиј Оптински, старец и монах, кој уште додека бил жив бил почитуван како светец. Неговиот лик е пример за силна вера која може да ја спаси душата.

 

При користење на материјалите на Russia Beyond задолжителен е хиперлинк до изворот од кој е преземен материјалот.

Дознајте повеќе

Овој веб-сајт користи колачиња. Кликнете овде за да дознаете повеќе.

Прифати колачиња