30-годишниот Дмитриј Лапаев од Иркутската област во Сибир се прикрал во Павловскиот дворец во Санкт Петербург, скршил прозорец и влегол во музејот, пишуваат медиумите.
Но, тоа не е сѐ. Талкал по салите повеќе од четири часа и дури и влегол во спалната соба на царицата Марија Фјодоровна, цело време пиејќи алкохол. Потоа малку отспал на паркетот. Пред заминувањето успеал да украде позлатена статуа. Влегувањето и кражбата следниот ден беа откриени од персоналот на музејот, кој соопшти дека вредноста на статуата е 5 милиони рубли (69000 евра).
Полицијата го пронашла Лапаев наредниот ден. Сѐ уште бил пијан и одел по плоштадот „Сенаја“ со статуата во раце. Ѝ објаснил на полицијата дека ја нашол статуата во ендек, но кога му ја покажале снимката од музејот, тој ја признал кражбата. Туристот од Сибир ќе помине два месеца во затвор.