Дознајте кој е најдобриот град за живот во Русија (и тоа не е Москва)

Градови во Русија има многу, но кои од нив ги имаат најдобрите услови за живот? Финансискиот универзитет при Владата на Руската Федерација ја испита ситуацијата и даде одговор на тоа прашање. Жителите ги оценија условите за живот, комуналните услуги, инфраструктурата и одговорија дали се подготвени да го продолжат животот во еден од 38 најголеми градови или да се преселат на подобро место.

И еве како изгледаат резултатите:

10. Оренбург

Пешачки мост во Оренбург

Legion Media

На десеттото место е градот на реката Урал, 1460 км југоисточно од Москва, најпознат по оренбуршките марами и исклучителната геополитичка локација – токму на границата меѓу Европа и Азија. Ако се земат предвид резултатите од истражувањата, Оренбург ни најмалку не е лошо место за живот: здравствениот систем, квалитетот на патиштата и ефикасноста на комуналните услуги се на високо ниво.

9. Новосибирск

Театарот на драма и балет во Новосибирск

Legion Media

Третиот најнаселен руски град (1,6 милиони жители) е и еден од најживите градови на Сибир. Новосибирск е голем индустриски центар на реката Об, во него изобилство убави места за гледање, а има и свој научен град-сателит кој се вика Академгородок.

8. Краснојарск

Фонтаната пред железничката станица во Краснојарск

Legion Media

Краснојарск е уште еден важен град на Сибир познат по хидроенергијата, машиноградбата и фабриките за обоена металургија. Основан 1628 година како јужно упориште на реката Енисеј, денес има повеќе од еден милион жители и е полн со културно богатство.

7. Екатеринбург 

Споменик на тастатурата во Екатеринбург

Legion Media

Градот на Урал, околу 1800 км источно од Москва, е четврти во Русија по бројот на жители (1,4 милиони). Екатеринбург е одлично место за да се стекнете со образование, живописен стар град но и отворен за сѐ што е ново, со голем број продавници и ресторани. 

6. Челјабинск 

Паркот „Гагарин“ во Челјабинск

Legion Media

Челјабинск се прослави во светот со метеоритот кој го пресече небото во 2013 година, но градот има многу повеќе од таа приказна. Основан е 1736 година и до изградбата на Танссибирската железница беше главниот сообраќаен јазол во регионот. За време на Втората светска војна сите фабрики произведуваа оружје и тенкови. Денес Челјабинск е важен економски, културен и спортски центар. Има 1,2 милиони жители. 

5. Санкт Петербург 

Василевски остров, Санкт Петербург

Legion Media

Петтото место ѝ припадна на „руската престолнина на културата“. Белите ноќи, градот во вечно движење и познатите историски места се она што жителите го сакаат најмногу во поранешниот Ленинград. 

4. Краснодар 

Улицата „Краснаја“ во Краснодар

Legion Media

Градот 1345 км југозападно од Москва ужива во топлата клима и е еден од руските градови кои најбрзо се развиваат: последниве 7 години бројот на население порасна за 76% и во 2017 година достигна 1,3 милиони. Градските власти велат дека Краснодар со своите климатски и економски можности е привлечна дестинација за оние кои живеат во северните региони на Русија. А неодамна во него беше отворен уште еден прекрасен парк.

3. Казањ

Палатата на земјоделството во Казањ

Legion Media

812 км источно од Москва, Казањ докажа дека е еден од градовите кои нудат најдобри стандарди за живот: 96% од испитаниците така го оцени својот град. Локалните власти изградија одлична инфраструктура, а од патиштата со европски квалитет се задоволни сите. 

2. Москва

Бизнис центарот „Москва сити“

Legion Media

Близу, но сепак на друго место. Рускиот главен град непрестајно ја менува својата инфраструктура за да ги задоволи потребите на населението и гостите. Според истражувањето на јавното мислење, околу 70% Московјани сметаат дека Москва е најдобриот град за живот во Русија. 

1. Тјумењ

Поглед на манастирот „Св. Троица“ во Тјумењ

Legion Media

Еве го и победникот! Тјумењ е втора година по ред најдобриот руски град за живот. Тоа е еден од најстарите сибирски градови и главен град на регионот богат со нафта, што обезбедува добар приток на пари во градската каса. Полн е со историски знаменитости и модерни комерцијални центри. На прво место е во образованието,  во сферата на комуналните услуги и инфраструктурата.

А еве го рејтингот на 10 најповолни руски градови за живот според можноста за вработување, екологијата и локалните власти.

При користење на материјалите на Russia Beyond задолжителен е хиперлинк до изворот од кој е преземен материјалот.