7 места во Виборг кои морате да ги посетите (ФОТО)

• Ве очекуваме на Телеграм-каналот https://t.me/rb_makedonija
• Вклучете го во пребарувачот „Show notifications“ (дозволи известувања) за нашиот сајт!
• Пријавете се на нашата неделна мејлинг листа

Главните знаменитости на Виборг укажуваат на долготрајното присуство на Финците, кои сé до 1940 година ја сочинуваа основата на населението на градот.

1. Стариот град

Историскиот центар на Виборг го сочинуваат зданија од различни епохи. Најживописни се градбите малку помлади од епохата на доцниот Среден век, кои потсетуваат на мали тврдини.

Тоа се Куќата на трговскиот еснаф на Светиот Дух (XIV век), Витешкиот дом (почеток на XVII век) и Куќата на граѓанинот (XVI—XVII век) во која е сместен туристички информативен центар.

На бројот 13 во улицата „Крепостнаја“ се наоѓа куќа која се смета за најстарата станбена градба во Русија. Во оваа еднокатница која потекнува од XVI век и ден-денес живеат луѓе.

Доминантна карактеристика на стариот град е Саат-кулата. Нејзините темели биле удрени кон крајот на XV век, меѓутоа неколку пати била обновувана поради бројни пожари. Денешниот изглед го добила на крајот на XVIII век и извесно време служела како противпожарна набљудувачница.

Од кулата може да се видат урнатините на Старата катедрала, уништена во 1939 година за време на Советско-финската војна.

Кулата на Ратуша (градското собрание) во улицата „Виборшка“ е изградена во втората половина на XV век. Некогаш била дел од одбранбените ѕидини на градот, потоа арсенал, па камбанарија на доминиканскиот манастир.

На Пазарскиот плоштад е сочувана Кружната кула, подагната кон средината на XVI век. Денес во неа има ресторан.

2. Виборшкиот замок

Тоа е вистинска средновековна тврдина, која кон крајот на XIII век ја основале Швеѓаните. Нејзин симбол е кулата „Свети Олаф“ висока 75 метри.

На малиот остров биле сместени магацин, затвор, арсенал, станбени и помошни објекти, штали и визби. Замокот го задржа своето воено значење до 1964 година, кога Министерството за одбрана на СССР го даде за да се формира музеј.

3. Финскиот национален романтизам

Обожавателите на архитектурата ќе забележат на улиците на градот голем број градби во стилот на северниот арт нуво, кој доминирал во изградбата на градот од крајот на XIX век практично сé до револуцијата во 1917 година.

Највпечатливи примери се пазарот и градбите на Проспект „Ленин“. Освен во Виборг, во Русија овој стил е масовно застапен и во Санкт Петербург.

4. Библиотеката на Алвар Алто

Единствената градба на познатиот фински архитект во Русија е изградена во 1933-1935 година во стилот на модернизмот.

Во неа се наоѓа голема читална со кружни тавански прозорци и сала за концерти и предавања со брановиден дрвен таван и панорамски прозорци.

Објектот е реновиран во 2013 година и речиси целосно му е вратен првобитниот изглед. Библиотеката можете да ја посетите како дел од организирана екскурзија или ако дојдете на бесплатно предавање, изложба или концерт.

5. Паркот Монрепо

Архитектонско-парковиот ансамбл и карпестиот пејзажен парк во негова близина од XVIII-XIX век се наоѓаат подалеку од историскиот центар на градот.

Станува збор за поранешниот имот на претседателот на санктпетербуршката Академија на науките Лудвиг Николаи. Овде можете да се прошетате по добро уредените патеки и речиси недопрениот шумски дел на паркот, да се повозите со бротче по заливот и да се качувате по карпите.

6. Бастионот Панцерлакс

Поранешниот бастион на тврдината е еден од најдобрите видиковци во градот. Нуди поглед на Јужното пристаниште, пристаништето и покривите на старите згради.

Исто така, Панцерлакс послужил како основа за две згради подигнати во 1930 година во стилот на модернизмот. Денеска во едната е сместена филијалата на Ермитаж, а другата е детско уметничко училиште. А во казаматите и барутницата на бастионот се сместени археолошки поставки.

7. Пејачко поле

Просторот за хорски фестивали на отворено е создаден во 1932 година на територијата на поранешните Источновиборшки утврдувања (од педесеттите години на XX век тука има градски парк). Сцената на неколку нивоа направена од гранитни блокови потсетува на грчките амфитеатри.