Не пропуштајте!
Придружете се на Russia Beyond на Телеграм за повеќе есклузивни содржини
Првото нешто што секој турист би требало да го направи е да го посети самото срце на Москва - тоа е главниот и најубавиот плоштад (што всушност значел порано зборот „краснаја“)!
Постојат неколку начини да го истражите:
За да влезете во Кремљ треба да купите билет или, уште подобро, да резервирате обиколка со водич. Меѓу ѕидините на Кремљ ќе најдете древни цркви, каде што порано биле крунисувани и погребувани руските цареви, како и да ја истражите величествената архитектура на Кремљ која ја отсликува богатата историја на земјата. И, конечно, можете набрзина да ги посетите музеите на Московскиот Кремљ и да им се восхитувате на артефактите од различни руски царски епохи: кочии, престоли, круни и најневеројатните оружја и накит.
За повеќе информации, посетете ја официјалната веб страница на Кремљ. Зиме е отворен од 10 до 17 часот (и е затворен во четврток).
Многу спектакуларно (и бесплатно) нешто е да гледате како почесната гарда врши церемонијална смена на Гробот на непознатиот војник и Вечниот пламен кои се наоѓаат во Александровската градина, веднаш до ѕидините на Кремљ. Секој час, од 8 до 20 часот, 1-та чета на Кремљовскиот (Претседателски) полк ја изведува оваа прилично стара и убава традиција.
На само неколку чекори од Црвениот плоштад се наоѓа фантастичниот парк Зарјадје, отворен во 2017 година. Можете да шетате меѓу многу пријатните ботанички украси и да ги истражувате руските климатски зони, бидејќи секоја од нив е претставена во соодветните подрачја, заедно со флората од тие зони. Паркот има и подземен музеј, „ледена пештера“ и 3Д кино, каде што можете да учествувате во виртуелна авантура - лет над Москва! Сепак, она на што дефинитивно нема да можете да одолеете е лебдечкиот мост во вид на бумеранг над реката Москва, едно од најдобрите места за правење селфи.
Можете исто така да ручате набрзина или да се опуштите со шолја кафе или чај во паркот.
Се разбира, најелегантниот начин да се заврши денот во Москва би бил да отидете на балет во театарот „Бољшој“ (во идеален случај, да го гледате „Оревокршачка“!). Меѓутоа, набавката на билети за „Бољшој“ не е лесна задача и би требало да се изврши многу пред вашата посета.
Но, немојте да се секирате доколку не успеете да набавите билети за „Бољшој“. Москва има десетици други опции за гледање балет (или опера). Не помалку брилијантни претстави може да се видат во Музичкиот театар „Станиславски и Немирович-Данченко“ или во Државната Кремљовска палата (патем, ова е уште еден начин набрзина да ѕирнете во внатрешноста на Кремљ!).
Нема многу други градови со толку голем избор на ресторани со различни вкусови и стилови. Авторитетниот водич на „Мишелин“ го објави својот избор на најдобри ресторани во Москва во 2021 година. А еве го и нашиот водич за тоа како да јадете во Москва за мали пари. Но, ако се најдете во кругот на театрите„ Бољшој“ или „Немирович-Данченко“, тогаш „Др. Живаго“ дефинитивно би бил добар избор (и секогаш е отворен).
Москва е дефинитивно град на кафето! На секое ќоше можете да најдете кафулиња и сите нудат широк спектар на пијалоци. Пробајте „раф“ кафе, сладок, кремаст пијалок измислен во Русија (и именуван по пронаоѓачот Рафик), или осмелете се да изберете од некоја од многу необичните понуди како кафе со сирење или кафе во стилот на советските слатки ( погледнете го нашиот водич за кафе ТУКА).
Друг возбудлив начин за истражување на Москва е да го погледнете градот од вода. Бродовите крстарат по реката Москва во текот на целата година. Повеќето ја започнуваат својата рута од хотелот „Украина“, еден од облакодерите на Сталин „Седумте сестри“, и ве враќаат на истото место откако ќе ги поминете средновековниот Новодевички манастир, Московскиот државен универзитет и стадионот Лужники, катедралата „Христос Спасител“ и џиновскиот споменик на Петар Велики и многу други знаменитости.
На бродот температурата е секогаш оптимална, а имаат и огромни панорамски прозорци. Има бродови со ресторан кои нудат комплетна атмосфера, така што можат да бидат убаво место за појадок или ручек.
Ако не сте љубител на водата, тогаш откријте ги другите, необични страни на Москва - изберете една од активностите што ви ги подготвивме ТУКА!
До април 2024 година, изложбениот парк ВДНХ од советската ера е домаќин на огромна изложба „Русија“, со мноштво активности и изложби посветени на Русија, нејзината култура, наука и природа. Проверете го нашиот посебен водич за тоа што да правите таму!
На саемот беше отворена цела „Куќа на руската кујна“. Ќе најдете 15 штандови со храна со водечки јадења од Камчатка, Сибир, Карелија и други региони на Русија. Замислете да пробувате различни кујни и јадења на едно место без да морате да патувате никаде, било да се тоа алтајски пељмени, тулски калач или кавкаски пити! Совршено место за ручек.
Изложбениот парк ВДНХ е одлично место за посета, воопшто! Неговите павилјони се совршен пример за архитектурата од времето на Сталин и речиси можете да се чувствувате како да сте патувале назад во времето! Во паркот ќе најдете и неколку интересни музеи - посветени на истражување на вселената, руската историја, па дури и „Гаража за специјални намени“, која прикажува различни возила што ги користеле лидерите на земјата.
И, конечно, можете да се возите на највисокото панорамско тркало во Европа – „Сонцето на Москва“ – кое ќе ви овозможи поглед на градот од височина од 140 метри!
Лизгањето е една од најпопуларните и најдостапни активности во Москва. Постојат неколку одлични лизгалишта на живописни локации кои се отворени во текот на зимата. Едно од најголемите лизгалишта во Европа се наоѓа во гореспоменатиот парк ВДНХ, или можете да го посетите она во паркот Горки (уште едно многу популарно московско место), или малото, но елегантно лизгалиште - на Црвениот плоштад!
Сите паркови нудат изнајмување лизгалки, така што сé што ви треба е топла облека, наполнет телефон за бележење спомени и добро расположение! Во Москва зиме се стемнува во 16:30 часот и тогаш се палат стотици светилки, претворајќи го градот во џиновска бајка!
А ако не сте спортски тип, избравме неколку други необични активности што можете да ги правите во Москва. На пример, дали знаевте дека има цел кварт со дачи (викендички), на само 10 минути од центарот, опкружен со огромни нови згради? Што мислите да прошетате таму и да ја почувствувате советската атмосфера?
По сите овие активности на отворено, што може да биде подобро од топол пријатен бар со топол пијалак и пријатно друштво? Москва е град полн со забава за сите вкусови. Значи, ако знаете руски или сакате да го вежбате, одете во театар или гледајте стенд-ап комедија. Москва дури има и хумористични емисии на англиски јазик, каде што можете да слушнете и Руси кои течно зборуваат англиски, така и странци (Британци и Американци) кои живеат во Русија како зборуваат на лош руски или руски со силен акцент (проверете ги датумите на нивните емисии на Телеграм-каналот „Московска англиска комедија“)!
Москва никогаш не спие, како што можеби сте слушнале. Што значи дека има многу барови и ноќни клубови каде што можете да се напиете пијалак (или два или три) и да разговарате со различни луѓе. Забавувајте се и не пропуштајте го вашиот лет (или пропуштете го и останете подолго во најдобриот град на светот)!
При користење на материјалите на Russia Beyond задолжителен е хиперлинк до изворот од кој е преземен материјалот.
Претплатете се
на нашиот билтен!
Добивајте ги најдобрите стории на неделата директно во вашето сандаче