Американски аналитичари: Како да се спасите од ракета „Циркон“ која за 60 секунди прелетува 160 км?

Американските воени експерти ја споделија својата сериозна загриженост по повод скорешната појава на новата руска хиперсонична ракета „Циркон“ со читателите на сајтот Popular Mechanics.

„Се наоѓаме на чекор од почетокот на нејзиното сериско производство. Првата ракета „Циркон“ најверојатно ќе ја добијат офанзивните нуклеарни подморници од класата „Јасен“. Нејзините практични тестирања ќе бидат извршени следната година, а ќе ја лансира атомската подморница „Казањ“, пренесува порталот Marsonline. 

Гигантската брзина на оваа ракета го прави невозможно нејзиното соборување, затоа што не остава практично ни најмалку време за реакција. По стартот, „Циркон“ е во состојба да одлета многу брзо на висина од 30 км и да се устреми кон целта. При брзина од 8 маха ракетата за само една минута може да прелета растојание од 160 километри. Моќниот радар за набљудување SPY-1, кој е интегрален дел на ПВО/ПРО-системот Aegis (се наоѓа на американските ракетни крстосувачи од класат е Ticonderoga) може да детектира опасност на оддалеченост од 300 км. Се разбира, ова е податок кој се однесува на  цели што летаат на голема висина. Значи, во најидеални услови, американскиот крстосувач мора да организира пресретнување на забележаната цел во наредните две минути, за да не биде погоден, пренесува интернет-порталот РГ.

Но, ако „Циркон“, како и другите противбродски ракети од руско потекло, лета кон својата цел на исклучително ниска висина, тогаш нејзиниот погодок е неизбежен! Имено, радарот SPY-1 открива ваков тип на цели на само 50 км. Тоа значи дека на екипажот на бродот му остануваат само 20 секунди да ја пресретне ракетата, што е невозможна задача.

Кое е решението?

Според американските воени експерти, за решавање на овој многу сложен проблем постојат две опции:

Прво, неопходно е на голема висина да се распоредат радарско- набљудувачки станици. Такво нешто веќе имаме во пракса. Имено, два аеростата со радарска апаратура JLENS се наоѓаат на постојано дежурство чувајќи го источниот брег на САД од потенцијален ракетен напад врз Вашингтон.

Второ, потребно е сите за противракетна одбрана да бидат поврзани со помош на нови форми на контрола, имено со системи кои почиваат на вештачка интелигенција. Нивната ефикасност во брзото носење исправни решенија е далеку поголема отколку кога со овие системи управува човечки фактор. Меѓутоа, ова има и свои ризици доколку пресретнувањето се врши во област каде има интензивен цивилен воздушен сообраќај.

Треба да се напомене дека радарскиот комплекс JLENS е наменет исклучиво за откривање на нисколетечки крстосувачки ракети. Од хиперсоничните ракети кои летаат и до 10 пати побрзо од звукот, САД во моментов немаат соодветна заштита.

Прочитајте повеќе: Русите наскоро ќе ја тестираат суперсоничната ракета „ОНИКС-М“ која ќе носи атомска боева глава

При користење на материјалите на Russia Beyond задолжителен е хиперлинк до изворот од кој е преземен материјалот.