„Што се однесува до поморското базирање, познатите ракети „Томахавк“ се веќе мошне стари, навистина. Праксата на нивната примена во Ирак и Сирија, според податоците на нашите воени експерти, покажува дека нивната ефикасност е некаде околу 30%. Ним секако им е потребно усовршување. Ситуацијата е малку подобра кога станува збор за ракетите со воздушно базирање“, изјави Путин, пренесува РИА „Новости“.
Рускиот претседател исто така истакна дека со најновото руско оружје е осигурана безбедноста на Русија неколку децении однапред и тој факт ќе ги присили оние кои навикнале на милитаристичка реторика добро да се замислат.
Шефот на Белата куќа Доналд Трамп претходно изјави дека ракетите истрелани врз Сирија се „нови и паметни“.
Од друга страна, во мај беше соопштено дека американското Министерство за одбрана има намера да се откаже од производството на крстосувачките ракети „Томахавк“ бидејќи не одговараат на современите потреби.