Мразокршачот „Илја Муромец“ свечено предаден на Воената морнарица на Русија

„Северната флота одамна чекаше свој мразокршач. Сега добиваме брод кој по својата функционалност ги надминува рамките на обичните пловила“, соопшти на церемонијата Виктор Барсук, заменик-командант на Воената морнарица на Русија, пренесува порталот rg.ru.

Мразокршачот во најскоро време ќе отплови во Мурманск.

„Илја Муромец“ е првиот мразокршач кој во изминативе 45 години е направен исклучително за потребите на Воената морнарица на Русија. Изградбата почна на Адмиралитетското бродоградилиште на 25  април 2015 година, а бродот беше спуштен во вода минатото лето.

Мразокршачот „Илја Муромец“ е главниот брод од серијата 21180. Во рамките на тој проект во Русија се прават бродови од новата генерација. Најважната техничка иновација е конструкцијата со ротирачки елиси кои се прицврстени надвор од трупот на бродот и можат да се движат околу вертикална оска за 360 степени. Таквата технологија му овозможува на бродот да се движи нанапред, наназад и бочно.

Овој мразокршач има импозантни димензии. Долг е 85, а широк 20 метри. Газалиштето изнесува до 7 метри. Развива брзина од 15 јазли и совладува ледена покривка дебела 1 метар. Бродот има 32 членови на екипажот.

При користење на материјалите на Russia Beyond задолжителен е хиперлинк до изворот од кој е преземен материјалот.