Исклучително убави настани во Русија од 2020 година на фотографии

Александр Авилов/Moskva agency; Григориј Сисоев/Sputnik; Владимир Астапкович/Sputnik
Коронавирус, ограничувања, карантин, протести... Се чини дека 2020 година беше тотален кошмар. Но таа, како и секоја друга година, донесе и многу добри нешта. За да се наполниме во пресрет на 2021 година со добра енергија и да не изгубиме надеж за позитивните промени што ќе следат, во овој текст го собравме само најдоброто од 2020 година во Русија.

Јануари

Дочекот на Новата година во Москва

Новата 2020 година за Русите почна како и обично. Новогодишни саеми со подароци, свечено осветлување во градовите, весели зимски забави без социјална дистанца.

Февруари

Отворање на паркот „Островот на мечтата“ во Москва

Последниот ден од февруари во Москва е отворен најголемиот забавен парк за деца и возрасни „Островот на мечтата“. Просторот е поделен на девет тематски зони посветени на јунаците на цртаните филмови. Помалку од три недели подоцна, на 17 март, паркот поради „самоизолација“ е затворен до 10 јули.

Март

Консултант на синџири продавници за пиво дегустира примероци на пиво на својата тераса дома во Москва во режим на самоизолација.

За многумина работата од дома стана тешко искушение, а многу бизниси беа затворени поради ограничувањата. Но, за илјадници луѓе изолацијата беше време поминато со семејството и други драги луѓе, време за подобро запознавање и можности за моменти на заедничка радост.

Април

Пуста Москва

Пред да бидат воведени ограничувањата за движење низ градот, карантинот им овозможи на многумина можеби првпат во животот да ги видат омилените места во градот без гужва од туристи и други луѓе кои брзаат за работа. Во парковите на големите градови почнаа да се враќаат птиците и животните, а корисниците на интернетот почнаа да забележуваат дека „природата се прочисти“.

Мај

Авиони над Црвениот плоштад

Традиционалната Парада на Победата во Москва на 9 мај е одложена за 9 јуни, но воздухопловниот дел на програмата беше изведен.

Жителка на Тјумењ со портрети на ветерани на Втората светска војна пее песни од воените години со учесници во акцијата „Парада дома“.

Одот на „Бесмртниот полк“, акцијата во која Русите се сеќаваат на членовите на своите семејства кои учествувале во Втората светска војна, се реализира онлајн.

Јуни

Кафуле во Москва

Во руските региони е укинат или ослабен режимот на самоизолација, како и електронските пропусници. Се отвораат летните бавчи и кафулињата во големите градови. Вистина, со ограничувања: се бара одржување дистанца и носење маски.

Во Москва, Санкт Петербург, Волгоград, Самара, Севастопол и други градови во земјата се одржува Парадата на Победата која поради пандемијата беше одложена за 24 јуни. Овој датум не е случајно одбран: тој ден 1945 година преку Црвениот плоштад поминаа советските војници кои го освоија Берлин.

Индиски војници на Парадата

Во 2020 година, освен руски војници, во Парадата на Црвениот плоштад учествуваа гости од Србија, Индија, Молдавија, Киргистан, Белорусија, Ерменија и Кина.

На 30 јуни претседателот на Русија Владимир Путин и претседателот ан Белорусија Александар Лукашенко свечено го отворија воениот меморијал во Ржев (Тверска област) во знак на сеќавање на борбите во тие краишта 1942-1943. 

Јули

Туристи на плажа во Сочи

Во ек е сезоната на одмори. Поради затворените граници и тешката економска ситуација предизвикана од пандемијата, Русите го поминуваат летниот одмор во земјата. За многумина тоа е можност подобро да ја запознаат својата земја.  

Туризам на Камчатка

Најпопуларна дестинација се плажите на Црното море во Сочи, Анапа и на Крим. Но, Русите исто така патуваат во оддалечените региони како Сибир, Урал и Далечниот Исток.

Август

Претседателот Владимир Путин соопшти дека е регистрирана првата вакцина на светот против коронавирус „Спутник Vˮ од Институтот „Гамалејаˮ. Тоа е двокомпонентна вакцина која се дава во интервал од три недели.

Септември

Во Москва по реконструкцијата е отворено Северното речно пристаниште, една од првите згради подигнати во духот на „сталинскиот ампирˮ. 

Октомври

Туристи во Пјатигорск

Русија, како и повеќето други земји, останува затворена за туристите. Но, во октомври владата соопштува дека ќе биде воведено издавање електронски визи за граѓаните на 52 земји, вклучувајќи ги Европската Унија и САД. Патувањата ќе бидат можни во 2021 година по целата земја во текот на 16 дена. За добивање виза е потребно да се пополни формулар онлајн и да се плати такса од 40 долари.  

Ноември

Во Русија на 4 ноември е одбележан Денот на народното единство, иако со ограничувања: маски и ракавици.

А уште во ноември ширум земјата почнуваат да се отвораат лизгалишта и да се создава новогодишно расположение. Градовите на Русија се китат со елки и украси.  

Декември

Земјата се подготвува за дочекот на Новата 2021 година. Во повеќето региони се откажани сите масовни прослави и е забранета работа на рестораните во текот на празниците. Но, се појавија нови креативни новогодишни украси.

При користење на материјалите на Russia Beyond задолжителен е хиперлинк до изворот од кој е преземен материјалот.

Овој веб-сајт користи колачиња. Кликнете овде за да дознаете повеќе.

Прифати колачиња