Претседателот на Русија Владимир Путин смета дека фаворите на Светското првенство во фудбал кое ќе се игра летово во Русија се Бразил, Аргентина, Германија и Шпанија.
„Фаворити има многу. Тоа се и латиноамериканските тимови - Аргентина и Бразил. Знаеме дека репрезентацијата на Германија играше одлично на последните првенства. Многу убав фудбал покажа и шпанската екипа“, рече Путин во интервју за кинеските медиуми.
Говорејќи за шансите на руската репрезентација, Путин рече дека во последно време репрезентацијата не покажала големи резултати, но се надева дека фудбалерите ќе се борат до крај. „Ние, сите навивачи и сите љубители на рускиот фудбал, многу се надеваме дека руската репрезентација ќе даде сѐ од себе и ќе покаже возбудлив, убав фудбал и дека ќе се бори до крај“, истакна Путин.
А најдобрите играчи во историјата на фудбалот според Путин се Јашин, Пеле и Марадона. „Најдобриот руски, советски фудбалер е Лав Јашин, а најдобар странски фудбалер е Пеле. И Марадона го почитувам многу“, рече Путин.
Kremlin Pool / Global Look Press
Претседателот на РФ додаде дека главната задача на Русија како држава која го организира турнирот да направи од Мундијалот празник за милионите љубители на фудбалот во целиот свет. Рускиот претседател инаку задолжително ќе присуствува на првиот и на последниот натпревар на Мундијалот, а доколку не го спречат обврските, вети дека ќе дојде и на некои други натпревари.