Салата „Руска убавица“: слоеви елеганција (РЕЦЕПТ)

• Ве очекуваме на Телеграм-каналот https://t.me/rb_makedonija
• Вклучете го во пребарувачот „Show notifications“ (дозволи известувања) за нашиот сајт!
• Пријавете се на нашата неделна мејлинг листа

Легендата вели дека салатата „Руска убавица“ првпат ги красела масите на почетокот на ХХ век во реномираниот ресторан „Москва“ во срцето на главниот град. Инспириран од розовите образи на една исклучително убава жена, готвачот додал цвекло за да ја имитира нејзината боја, давајќи ѝ ја на салатата препознатливата црвена нијанса.

Друга приказна ја поврзува оваа салата со познатата руска балерина од царско време, Ана Павлова. Како што вели легендата, Павлова го открила вкусното јадење во еден московски ресторан и се распрашала за неговото име. Одговорот ѝ годел на нејзините уши: салата „Руска убавица“.

Која верзија и да е вистинита, јасно е дека салатата со својата блескава црвена боја предизвикува асоцијации на прекрасните руски девојки и нивната женственост.

Ако во првата верзија на салатата се споменува цвекло кое ѝ ја дава црвената боја, модерните готвачи можат да го изберат најдостапниот црвен зеленчук - доматот, а понекогаш и црвен пипер. Кога ќе се исечкаат, тие исто така потсетуваат на скапоцени рубини, додека другиот зеленчук додава живописни бои на смарагди и дијаманти.

За деликатниот вкус на оваа салата е одговорен мајонезот, кој стана широко распространет во руската кујна во ХХ век. Останатите состојки вклучуваат варени компири, јајца и пилешки гради. Се разбира, можете да експериментирате со состојките, додавајќи своои по вкус за да создадете ремек-дело.

Не знаеме со сигурност дали првата салата „Руска убавица“ била направена во тркалезна форма, исто како класичната „руска салата“ (позната како „оливје“ во Русија), или се служи на друг начин. Но, модерната верзија го повторува обликот на традиционалниот руски женски украс за глава познат како „кокошник“. Ајде да се обидеме да ја направиме!

Состојки за 5-7 порции:

• Варен компир - 5-6 парчиња
• Шунка - 300 г
• Варени пилешки гради - 300 г
• Сирење - 200 г
• Свеж домат - 2-3 парчиња
• Свежи краставици - 1-2 парчиња
• Варени јајца - 4 парчиња
• Мајонез - по вкус
• Зеленчук и зелје (неколку колца краставица, пченка од конзерва, магдонос) за декорација

Подготовка:

1. Компирот, јајцата и пилешките гради сварете ги неколку часа однапред пред подготовката на салатата.  

2. Оставете целосно да се оладат.

3. Варениот компир излупете го и крупно изрендајте го, формирајќи го првиот слој.

4. Компирот редете го во форма на „кокошник“.

5. „Кокошникот“ сега полека премачкајте го со мајонез.

6. Шунката ситно исечкајте ја и наредете ја врз компирот, па повторно полека премачкајте ја со мајонез.

7. Ситно исечкајте ги краставиците и ставете ги врз шунката, па исто така премачкајте ги со мајонез.

8. Варените пилешки гради ситно исечкајте ги и наредете ги врз краставичките, и погодувате – пилешкото полека премачкајте го со мајонез.

9. Изрендајте го сирењето на ситно ренде и ставете го врз пилешкото — и да, преку сирењето полека намачкајте мајонез.

10. Составете ја салатата, рамнејќи ја со раце, и уште еднаш полека премачкајте го со мајонез последниот слој сирење и страните на салатата.

11. Варените јајца раздвојте ги на белки и жолчки. Изрендајте ги белките и посипете ги по рабовите на салатата. Изрендајте ги жолчките и посипете го врз врвот. Салатата уште еднаш стиснете ја и последен пат полека премачкајте ја со мајонез.

12. Поминете на доматите. Извадете ги семките и течноста, оставајќи ги само ѕидовите на доматите.

13. Исечкајте ги на коцки и наредете ги на врвот.

14. Салатата украсете ја по свој вкус. Јас користев и колца краставица, пченка од конзерва, магдонос и мајонез. Вашата живописна и убава салата „Руска убавица“ е подготвена!

Сега е време за уживање!