- Ве очекуваме на Телеграм-каналот https://t.me/rb_makedonija
- Вклучете го во пребарувачот „Show notifications“ (дозволи известувања) за нашиот сајт!
- Пријавете се на нашата неделна мејлинг листа
Советскиот двокрилен авион Ан-2 за прв пат се вивна на небото во 1947 година. Како што се покажа, му било судено да стане еден од најуспешните проекти на воздухопловната индустрија на СССР. А во 1992 година дури и влезе во Гинисовата книга на рекорди како единствен авион на светот што се произведуваше без прекин цели 45 години.
Лав Поликашин / Sputnik
Првобитната ознака на овој двокрилец беше СХА („Сельскохозяйственный самолет Антонова“, т.е. „земјоделски авион „Антонов“) и беше наменет за потребите на земјоделството. Меѓутоа, се користеше и во цивилната авијација, за транспорт на товар, во противпожарната служба, Вооружените сили и во многу други сфери, но прекарот „кукурузник“ му остана засекогаш.
Е. Велчински / Sputnik
Веќе на крајот на 1940-тите, кога се појави, двокрилецот изгледаше како анахронизам. Авионите тогаш се правеа претежно како еднокрилци и имаа трап за слетување што се вовлекуваше за да се намали отпорот и да се зголеми брзината на авионот. Меѓутоа, бидејќи Ан-2 требаше да служи за наводнување на полињата со прскање од воздух, посоодветно беше да има помала брзина. Неговата максимална брзина е 258 km/h.
В. Артисевич / Sputnik
Според Алексеј Крјуков, генерален директор на воздухопловната компанија „РУСАВИАПРОМ“, се покажало дека конструкцијата на двокрилецот е незаменлива кога се работи за мал транспортен авион. „Благодарение на тоа, Ан-2 има уникатни карактеристики на летање: кратко полетување и слетување, мала брзина, одлично подигање (сила на потисок) и голема носивост. Може да носи до 1,5 тони товар, дури и големи.
Берсонс Марис / TASS
Двокрилецот е сигурен, лесен за ракување и одржување. Но, најважно е што може да полета и слетува од кратки, неподготвени терени, што е особено важно за Сибир и за Далечниот Исток, каде што нема многу големи аеродроми.
В. Јаковлев / Sputnik
Ан-2 лесно и брзо превезува патници до непристапни населби, до кои би требало многу долго време да се стигне со теренско возило или моторен чамец. Денес во Русија за превоз на патници и товар се користат околу 300 авиони Ан-2 со различни модификации.
Владимир Иванов / Sputnik
„Авионот Ан-2 може да се користи уште 10-15 години“, посочува Крјуков, „бидејќи работниот век на трупот Ан-2 изнесува 20000 часа лет, а многу авиони што се користат во воздухопловните компании се уште се далеку од таа вредност затоа што поминале во воздух само 3000-5000 часа“.
Андреј Сорокикн / Sputnik
Освен во Советскиот Сојуз, двокрилецот се произведуваше и во Кина и Полска. Беа направени вкупно околу 18000 авиони. Во советските претпријатија производството на Ан-2 заврши во раните 1970-ти, во полските претпријатија во 2002 година, додека во кинески Шиѓаџуанг Ан-2 сè уште се произведува под името „Yunshuji Y-5“.
Xu Zheng (CC BY-SA 4.0)
Познати советски актери и лидери на некои странски земји летаа со авион Ан-2. Меѓу нив се претседателот на Северен Виетнам Хо Ши Мин, шефот на Народната револуционерна влада на Гренада Морис Бишоп и кралот на Непал Махендра.
В. Чистјаков / Sputnik
Кога идниот советски лидер Леонид Брежнев во средината на 1950-тите беше на функцијата прв секретар на ЦК КП на Казахстан, тој исто така користеше Ан-2. „За нашите патувања беше неопходен. Пилотите го избираа местото за слетување од воздух и можеа да слетаат каде било во степата, на секоја бразда, до секој трактор или полски камп“, се сеќава тој.
TASS
Како воен транспортен авион, Ан-2 интензивно се користи во над дваесет земји. Овој двокрилец учествуваше во најмалку 40 вооружени конфликти, почнувајќи од Корејската војна, па сè до борбените дејствија во Нагорно Карабах во 2020 година.
Игор Агеенко / Sputnik
Најуспешната модерна модификација на советскиот авион е двокрилецот ТВС-2МС. Со сите предности на неговиот претходник, кај поновиот модел се подобрени перформансите на летот, тој е поудобен за пилотите и патниците, помалку е бучен и користи поевтин авионски керозин наместо авионски бензин.
ТВС-2МС
Тој авион сериски се произведува од 2015 година и до денес се произведени околу 30 летала. „Овој број на авиони е поврзан со употребата на мотори со високи ресурси, така што ТВС-2МС е неколку пати поскап од Ан-2. Меѓутоа, дури и таа цена на ТВС-2МС е многу пониска од цената на увезените еквиваленти“, вели Алексеј Крјуков, чија компанија РУСАВИАПРОМ денеска ги произведува овие авиони.
ТВС-2МС