Падобранците добиваат своја „крилата“ артилерија: проектот „Лотос“ наскоро во состав на ВДВ

RIA Novosti
Перспективното самоодно артилериско орудие „Лотос“, кое специјално се проектира за употреба во руските Воздушно-десантни сили, најверојатно веќе во 2019 година ќе ја здогледа светлината на денот. Ова го истакна Дмитриј Семизоров, генерален директор на компанијата „ЦНИИТочмаш“ која се занимава со развојот на „Лотос“.

Планирано е САУ „Лотос“ во 2019 година да ја заврши етапата на генерална тактичко-техничка проверка на ова средство која ќе се изведува во единиците на ВДВ. Доколку овие тестови се завршат успешно, од 2020 година се планира и негово сериско производство.

Основната намена на самоодното артилериско орудие „Лотос“ е огнена поддршка на падобранските единици на земја, кое како и останатата воздушно-десантна борбена техника ќе се десантира со падобрани.

Конструиран е со намера да го замени системот „Нона-С“. Руската армија, поточно нејзините воздушно-десантни единици во својот состав имаат околу 750 единици САУ „Нона“, од кои 250 се во оперативна состојба. Вооружен е со артилериското средство 2А51 со калибар од 120 мм кое има карактеристики на класичен топ, хаубица, но и на минофрлач. Значи може да дејствува со директна, но и со траекторија карактеристична за минофрлачите и хаубиците. Покрај неговата стандардна палета на муниција, може да гаѓа и со прецизна муниција „Китолов“ и „Грањ“.

Руските падобрански артилериски посади ќе го употребуваат „Лотос“ со артилериско орудие од 120 мм како за непосредна огнена поддршка на десантираните единици на земја, така и за дејство по непријателот во длабочината на фронтот.

Покрај овој калибар, планирано е ова средство да биде вооружено и со калибар 152 мм.

За разлика од експерименталниот проект „Зауралец-Д“ кој исто така фигурираше како решение за единиците на ВДВ, „Лотос“ ќе се одликува со нов изглед, поинаков систем на управување и ново артилериско орудие кое ќе може да стрела со модернизирана муниција која се развива посебно за него.

При користење на материјалите на Russia Beyond задолжителен е хиперлинк до изворот од кој е преземен материјалот.

Повеќе возбудливи стории и видеа на Фејсбук страницата на Russia Beyond-Македонија
Дознајте повеќе

Овој веб-сајт користи колачиња. Кликнете овде за да дознаете повеќе.

Прифати колачиња