Што треба да направите за да добиете руски пасош

Руските власти во последниве години работат на тоа процесот за поднесување барање за руско државјанство да стане што полесно. Посебен статус имаат поранешните државјани на СССР, луѓето што зборуваат руски, инвеститорите, висококвалификувани професионалци и талентирани млади луѓе. На почетокот на март претседателот Владимир Путин изјави дека државата е подготвена на секој можен начин да им го олесни престојот на странските студенти, меѓу другото и со тоа што ќе им помогне да добијат руско државјанство.

Значи, што е потребно за да добиете државјанство? Пред поднесувањето на барањето мора да престојувате барем пет години на територијата на земјата, да зборувате руски, да ги знаете основните историски настани и да дадете заклетва за верност на Русија.

Колку луѓе сакаат пасош и зошто?

Владимир Путин и Стивен Сигал во Кремљ, 2016.

Reuters

Според Министерството за внатрешни работи на Русија, во 2017 година дури 265.319 странски државјани добиле руско државјанство, во просек месечно околу 22.000 лица. Тоа е благ пораст во однос на 2016 година.

Последниве неколку години интернационалните ѕвезди и спортисти (да го споменеме само американскиот актер Стивен Сигал и бразилскиот фудбалер Марија Фернандес) добиваат руски пасоши. Некои тоа го имаат направено од љубов кон Русија, додека други бараат нови можности за продолжување на кариерата. Се чини дека тоа е популарен мотив и за обичните луѓе.

„Избрав земја во која можам да се преселам по завршувањето на студиите и максимално да ги искористам своите способности“, вели една млада жена од Литванија, објаснувајќи зошто решила да поднесе барање за руско државјанство. Европските земји не ми се привлечни поради локалниот менталитет, а и животот во нив е прилично скап“.

Една девојка од Украина која студира кинески јазик, исто така смета дека Русија нуди повеќе можности за професионален развој, како и многу отворени луѓе.

„Кога сум во Москва опкружена сум со луѓе кои се поуспешни, попаметни и поактивни од мене и тоа ме мотивира да се развивам. Знам дека во Москва ќе најдам работа што е поврзана со Кина“, вели таа.

„Се преселив од економски причини“, вели еден Французин кој поднесува барање за руско државјанство, а живее во градот Кунгур во Пермскиот крај веќе пет години. „Повеќе не можев да ја поднесам Франција... За мене таму немаше работа, јас сум пилот на балони, а во Лил, каде живеев има сè помалку и помалку туристи... Во Кунгур луѓето се пољубезни и поактивни. И клубот на луѓето што сакаат воздушни балони е пожив“.

Задолжителна проверка за знаење на јазикот

Getty Images

Пред поднесување на барање за руско државјанство, од странскиот државјанин обично се бара да добие привремена дозвола за престој.

За сите кои бараат руско државјанство се преименуваат следниве барања:

- Лицето мора на територијата на Русија да престојува најмалку пет години од моментот на добивање на дозволата за престој.

- Лицето мора да има законски извор на приходи.

- Лицето мора да се откаже од своето постојно државјанство.

- Лицето не смее да има криминално досие и мора да ги почитува законите на земјата.

- Лицето мора да зборува руски.

Покрај тоа потребна е медицинска потврда за здравствената состојба која се добива во одобрен медицински центар.

За дозвола за привремен престој мора да се докаже знаење на рускиот јазик, историјата и на руските закони. За државјанство пет години подоцна повторно следува детална проверка на знаењето на руски јазик.

Некои кандидати можат да бидат ослободени од ваков испит: државјани на Белорусија, лица со инвалидитет, малолетници, мажи постари од 65 и жени постари од 60 години, висококвалификувани стручњаци и членовите на нивните семејства, како и оние кои можат да докажат извонредно познавање на рускиот јазик.

Постои полесен и покус пат

Алексеј Филипов/TASS

Во определени случаи странските државјани кои бараат руско државјанство не чекаат пет години за да поднесат барање. Оние кои спаѓаат во некоја од овие категории можат да поднесат барање по само една година престој во Русија со дозвола за престој:

- Лице со исклучителни достигнувања во науката, технологијата или културата

- Лице кое има стручни квалификации кои се барани во Русија

- Лице кое има добиено политички азил во Русија

- Лице кое руските закони го признаваат за бегалец

Постои и посебна „поедноставна“ постапка која го намалува времето потребно за донесување одлука од една година на 3 до 6 месеци за оние кои:

- имаат статус „руски говорител“ (живеат во странство, но дома зборуваат руски и сакаат да се преселат во Русија)

- родени во Советскиот Сојуз или кои имале државјанство на СССР

- имаат родител кој е руски државјанин и кој живее во Русија

- кои се повеќе од три години во брак со државјанин на Русија

- имаат дете со руско државјанство

- имаат стекнато стручна подготовка во Русија и работат во земјата повеќе од три години

- имаат компанија во Русија повеќе од три години и плаќаат данок (не помалку од еден милион рубли годишно)

- инвеститори со повеќе од 10 отсто акции во руска компанија со капитал од најмалку 100 милиони рубли

- висококвалификувани стручњаци кои работеле во Русија подолго од 3 години

Оние што служат во руската војска по договор исто така можат да поднесат барање за државјанство по новата поедноставена постапка. Мораат да се откажат од своето постојно државјанство, да докажат познавање на руски јазик и да добијат потврда од раководството на војската. Дозвола за престој не е потребна.

Прочитајте уште: Како да си отворам фарма во Русија ако сум Македонец?

При користење на материјалите на Russia Beyond задолжителен е хиперлинк до изворот од кој е преземен материјалот.