Не пропуштајте!
Придружете се на Russia Beyond на Телеграм за повеќе есклузивни содржини
Во Русија, уште пред XVIII век, постоел популарен пијалак наречен взвар направен од сушено овошје, бобинки и билки (зборот взвар доаѓа од зборот да се вари, свари). Взварот обично се правел на Бадник, а понекогаш му се додавал и гриз за пијалакот да биде похранлив. Подоцна взварот му отстапил место на компотот, кој се готви побрзо и полесно.
Модерната варијанта на компотот е донесена во Русија во XVIII век од француски готвачи. Првично тоа било повеќе десерт отколку пијалак. Компотот се служел со пијалаци и сладолед, но не можел долго да стои, па Русите, со својата љубов кон зачувување на храната во тегли, почнале да додаваат повеќе шеќер и вода.
Модерната руска кујна има неколку верзии на компот. Во зима попопуларна е верзијата од суво овошје, која поради сувите сливи има темна боја. Меѓутоа, може да се направи и со сушени јаболка, кајсии, смокви, суво грозје. Се сеќавам на овој компот што го добивавме со ручек во градинка, училиште, во студентската менза.
Во текот на летната сезона, најпопуларните видови компот се прават од мали јаболка, сливи, цреши и круши. Честопати овие растенија раѓаат обилно, но свежото овошје има и киселест вкус. Меѓутоа, кога во овие компоти ќе додадете шеќер, тие ја добиваат својата вистинска полнотија на вкусот.
Меѓу најпопуларните бобинки за летен компот се црвените и црните рибизли, јагодите, огроздот, црешите и малините. Сè уште тврдам дека домашниот компот од бобинки е врвниот вкус на летото.
Како дете берев зрели бобинки од грмушките во градината, а потоа баба ми или мајка ми правеа сладок десерт. Една одлична карактеристика на компотот е тоа што можете да го сварите во вода со шеќер кое било од вашите омилени овошја или бобинки и секој пат ќе добиете различен вкус.
Главното нешто што треба да го запомните е дека на некои состојки им треба подолго време да се сварат, како што се јаболкото и рабарбарата, кои ги користам во мојот рецепт. Бобинките, наспроти тоа, треба да се варат само неколку минути. Минималното време за готвење помага да се зачуваат витамините и хранливите материи, додека бобинките го ослободуваат целиот свој вкус и арома во напитокот.
Исто така, претпочитам да користам помалку шеќер во мојот компот, поради што најтврдите состојки (корите на јаболкото и рабарбарата) ги варам со шеќер 20 минути, што резултира со инвертен шеќерен сируп. Потоа во овој сируп ставам бобинки, поради што не претерувам со шеќерот.
Резултатот е освежителен напиток со силен вкус и со многу витамини. Компотот може да се послужи и како десерт бидејќи бобинките и овошјето го задржуваат исклучителниот вкус.
1. Јаболката се мијат и лупат и им се вади јадрото. Лушпите и јадрото ќе ни требаат за сирупот. Лушпите и јадрото на јаболката се ставаат во тенџере.
2. Рабарбарата се сече на големи парчиња и се става во тенџерето.
3. Се додава шеќерот.
4. Се прелеваат со врела вода.
5. Се остава да врие околу 20 минути. Би требало да се добие богат, сладок сируп.
6. Додека сирупот врие, се подготвуваат овошјето и бобинките. Јаболката се сечат на кришки.
7. Јагодите се мијат и луштат.
8. Ми останаа замрзнати малини од минатата година; новите што растат во градината сè уште не се зрели. Ги додавам во бобинките.
9. Остатокот бобинки се подготвува.
10. Течноста се цеди низ сито.
11. Се додаваат јаболката и огроздот, па се динстаат во сирупот 3 минути.
12. Се исклучува ринглата и се сипува остатокот бобинки во топлиот напиток.
13. Се покрива со капак и се остава додека не се олади. Кога ќе се крене капакот, ќе ве заплиснат неодоливиот мирис и вкус на летни бобинки.
14. Компотот се сипува во бокал и се става во фрижидер да се олади или пак едноставно пробајте го веднаш.
Уживајте во компотот во текот на убав летен ден на отворено или дома.
Не заборавајте дека овошјето е вкусно!
При користење на материјалите на Russia Beyond задолжителен е хиперлинк до изворот од кој е преземен материјалот.
Претплатете се
на нашиот билтен!
Добивајте ги најдобрите стории на неделата директно во вашето сандаче