Русија доби уште 4 милионски градови во 2022 година

• Ве очекуваме на Телеграм-каналот https://t.me/rb_makedonija
• Сите наши најнови и најактуелни текстови пристигнуваат директно на вашиот паметен телефон! Ако „Фејсбук“ одбива да ги споделува нашите објави, со „Телеграм“ сме секогаш со вас!
• Вклучете го во пребарувачот „Show notifications“ (дозволи известувања) за нашиот сајт!

Според податоците на рускиот попис на населението од 2021 година, објавен на 30 мај 2022, листата на руски милионски градови е ажурирана со неколку нови мегалополиси: Воронеж, Краснодар, Краснојарск и Перм. Дека овие градови сега имаат повеќе од еден милион жители, и претходно изнесуваа локалните статистичари, меѓутоа новите податоци и официјално го потврдија тоа.  

Краснодар

Краснодар е главен град на Краснодарскиот крај, каде што се наоѓаат популарните црноморски одморалишта (Сочи, Анапа). Тоа е исто така еден од најбрзо растечките градови во Европа, двојно зголемен во последните 10 години. Во моментов таму живеат околу 1,1 милион луѓе, но, според податоците на локалните власти, ако се бројат и жителите на најблиските приградски населби, оваа бројка реално достигнува 1,7 милиони жители. Тајната на популарноста на Краснодар е јасна: долги лета (ова е еден од климатски најтоплите градови во земјата), благи зими, близината на природните убавини (планините Кавказ и Црното море се оддалечени само стотина километри). Покрај тоа, многу е лесно да се најде работа во индустријата или во туристичкиот сектор таму.

Краснојарск

Еден од најголемите градови во Сибир, Краснојарск, исто така расте секоја година. Според градоначалникот, на почетокот на 2022 година градот имал 1,1 милион жители, што сочинувало повеќе од 40% од целиот Краснојарски крај. Втор по големина град на оваа територија е Норилск со само 180000 жители. Локалните жители го препорачуваат Краснојарск на туристите поради најдобриот поглед на големата сибирска река Енисеј, прошетките по источните планини на планините Сајан, кои започнуваат во самиот град, како и островскиот парк со северната плажа.

Перм

Во овој град на Урал сега живеат 1,05 милиони луѓе. Тоа беше милионски град уште во советско време, бидејќи имаше голем број фабрики (машински, петрохемиски), но во 1990-тите, поради економската криза, жителите почнаа да се селат во други региони. Сега луѓето се враќаат во градот, особено оние од руралните средини. Пописот од 2021 година официјално потврди дека Перм си го вратил статусот на град со милионско население. Покрај тоа, Пермскиот крај е еден од најголемите центри за производство и преработка на нафта во земјата.

Воронеж

Овој град, кој се наоѓа на 500 километри јужно од Москва, сега е дом на околу 1,05 милиони луѓе. Милионитиот жител беше роден во Воронеж уште во 2012 година, но оттогаш немаше драматично зголемување или намалување на населението. Градот и неговата околина се дом на електронската и хемиската индустрија.

Според прелиминарните податоци од рускиот попис на населението од 2021 година, во Русија се постојано населени околу 147,2 милиони луѓе, што е за 2,05 милиони повеќе во однос на пописот од 2010 година. Експертите забележуваат и пораст на урбанизацијата од 1% - која денес достигнува 75%. Најнаселени региони во Русија се Москва и Московската област, Краснодарскиот крај, Санкт Петербург, Свердловската и Ростовската област, републиките Башкортостан и Татарстан. Една третина од населението во земјата живее во овие области. Русија е рангирана на 4-то место во светот по бројот на градови со население од над 1 милион луѓе – повеќе имаат само Кина, Индија и Бразил.