Рускиот ден на љубовта

Денот на семејството, љубовта и верноста, кој годинава се одбележува по шести пат, е поврзан за една брачна двојка од Муром. 

Љубовта помеѓу Петар и Февронија е детално опишана во „Повеста за Петар и Февронија“ – ремек-дело на староруската книжевност од 16 век. Сопружниците управувале со Муромското кнежевство во 13 век, живееле долго, умреле на ист ден и биле закопани во ист гроб. Руската православна црква ги канонизирала во 1547 година. Оттогаш свети Петар и Февронија за православните христијани станале симбол на сопружничката љубов и верност. Горниот дом на рускиот парламент во 2008 година на празникот му го додели статусот Серуски државен празник и го дефинираше неговиот симбол: белата рада/ Идејата за празникот ја поддржаа сите конфесии во земјата.

Тогаш многу градови во Русија, во рамките на Сенародната програма „Во кругот на семејството“, започнаа да подигаат споменици на Петар и Февронија. Првиот споменик се појави истата 2008 година во градот Муром, татковината на православните светители. И нивните мошти се таму, у Троицкиот манастир. Веќе следната 2009 година споменици беа подигнати во Архангелск, Улјановск, Јарослављ, Сочи и во Абакан, а подоцна и во Нефтејуганск, Јошкар Ола, Самара, Владивосток, Благовештенск, Иркутск и во други градови. Минатата година, пак, беа откриени споменици и во Екатеринбург, Калуга, Тамбов и во Новосибирск. 

Оваа година по шести пат се врачува медалот „За љубов и верност“. Медалот им се доделува на брачните двојки кои живеат во брак 25 и повеќе години. Во организацискиот одбор годинава стасале огромен број пријави од цела Русија.

Споменик на Петар и Февронија во Јошкар Ола, Република Мариј Ел. Фотографија од слободни извори. 

Празнувањето на денот на Петар и Февронија често се споредува со денот на свети Валентин, иако настаните поврзани со овие празници, како и нивната смисла, многу се разликуваат. Денот на свети Валентин е ден на вљубените, исполнет со романтика и мали изјави на љубов. Рускиот празник става акцент на други аспекти на љубовта. Денот на свети Петар и Февронија е поврзан за поимите како што се семејството, брачната верност и љубовта која ги надминува сите животни искушенија. 

Денес младите во Русија самите избираат што ќе празнуваат. Ако некој сака да го помине времето во кругот на пријателите и да си разменува парчиња хартија исечени во облик на срце пробиено со стрела, тогаш тој го избира Денот на свети Валентин. А, на оној кому му се поважни националната традиција и историската содржина на празникот, повеќе му одговара Серускиот ден на семејството, љубовта и верноста, поврзан за древната руска приказна за брачната двојка Петар и Февронија.

Сите права ги задржува „Росијскаја Газета“.