Националните костими на претставничките на Русија на изборот за „Мис Универзум“ (ФОТОГРАФИИ)

• Ве очекуваме на Телеграм-каналот https://t.me/rb_makedonija
• Вклучете го во пребарувачот „Show notifications“ (дозволи известувања) за нашиот сајт!
• Пријавете се на нашата неделна мејлинг листа

Маргарита Голубева како „Принцезата-лебед“, 2023.

22-годишната Маргарита се појави во ликот на „Принцезата-лебе“, лик од познатата бајка. Костимот е дизајниран според истоимената слика на познатиот руски сликар Михаил Врубељ, а за негово изработка беа употребени 300 метри тул!

Ана Линикова и „Круната на Руското царство“, 2022.

Московјанката Ана Линикова се појави пред членовите на жирито во темноцрвен плишан фустан богато украсен со бисери, креиран од дизајнерката Олга Маљарова, инспирирана од атмосферата на Зимскиот дворец во Санкт Петербург и богатството на царските балови.

Ралина Арабова и казанската царица, 2021.

Ралина е од Татарстан и нејзината национална носија е инспирирана од ликот на Сјуујмбике, владетелката на Казанскиот канат од XVI век. На дизајнот работеше Султан Салиев. Костимот се состои од краток капут-камзол и макси здолниште од скап плиш, извезено со свилени мотиви. За украсување се користеа вештачки дијаманти и кристал.

Алина Сањко и брилијант на грбот, 2020.

Националниот костим на Алина предизвика бурни полемики на интернет, бидејќи очигледно никој не ја разбра неговата концепција. Дизајнерот Глеб Винокуров се оддалечи од традиционалните кокошници и ликовите на древните царици и ја претвори Алина во... брилијант. Но, ниту публиката ниту жирито не го разбраа ова дизајнерско решение и го нарекоа костимот „брилијантска нинџа желка“. 

Јулија Пољачихина и ликот на руска благородничка, 2018.

Жирито го оцени националниот костим на Јулија како еден од најдобрите. Таа на подиумот се појави во затворен темносин фустан со златни дезени, во кој наликуваше на руска благородничка. Дизајнер на костимот е Игор Дадиани.

Ксенија Александрова и традиционалното руско сликарство, 2017.

Националниот костим на Ксенија и оваа, како и неколку претходни години, го изработи Глеб Винокуров. Овој пат, дизајнерот најде инспирација во гжељот, традиционалниот стил на руското сликарство. Раскошната бела тоалета до подот со голи раменици е попрскана со блескави кристали и природни бисери.

Јулија Корољкова како рајска птица, 2016.

Концепцијата на костимот на Јулија беше многу необична. Костимот беше наречен „Птица на мирот“, а го дизајнираше Глеб Винокуров. Инспирацијата ја нашол во ликот на рајската птица Сирин од древните руски бајки, која има тело на птица и глава на девојка. Сепак, таквиот необичен костим не беше разбран од жирито (девојката испадна по првиот круг), ниту од многу жители на Русија, кои нејзиниот изглед во таква облека го карактеризираа како вулгарен.

Владислава Евтушенко како Жар-птица, 2015.

Владислава се појави во костим кој претставува нов концепт на жар-птицата од руските бајки. Таа беше облечена во припиен златен фустан со длабоко деколте, чипкани „крилја“ на грбот и прекрасен украс од пердуви на главата. Костимот е креиран од Глеб Винокуров.

Јулија Алипова во традиционална народна носија, 2014.

Руската натпреварувачка во 2014 година се појави во костим кој веднаш го сфатија сите. Тоа беше традиционален руски народен фустан со кокошник. Јулија преку фустанот имаше „душегреја“ (кратка струкирана јакничка која девојките ја носеле на празник) рачно извезена со скапоцени камења и бисери.

Елмира Абдразакова како руска кнегиња, 2013.

Елмира го освои третото место на натпреварот во категоријата „Национална носија“. Нејзината носија потсетува на ликот на руската принцеза Олга, а фустанот е изработен во стилот на традиционалните носии од времето на Иван Грозни.

Елизавета Голованова и мотиви од Павлов Посад, 2012.

Оваа национална носија претставуваше слободна интерпретација на традиционалниот руски фустан со павлопосадски шари. Наместо традиционален кокошник, девојката носеше голема цветна композиција надополнета со пердуви од паун на главата, а на вратот - ѓердан од природни бисери. Оваа облека за Елизабета ја креираше рускиот дизајнер Вјачеслав Зајцев.

Наталија Гантимурова и неочекуваната појава во бикини, 2011.

Костимот за Наталија го креираше дизајнерот Валентин Јудашкин, но на жирито не му се допадна. Наталија се појави на подиумот со кокошник на главата и во бикини преку кое беше префрлена голема марама од тантела.

Ирина Антоненко и познатата царска шапка, 2010.

Целиот костим на Ирина личеше на изгледот на познатата Мономахова шапка, царска реликвија, украсена со крзно од самур и скапоцени камења. А големата дијадема со вметнати бисери го комплетираше изгледот на натпреварувачката.

Софија Рудјева и хусарска униформа, 2009.

Софија на натпреварот за „Мис Универзум“ се појави во многу необична национална носија. Дизајнерите решија на здолништето да комбинираат елементи на хусарска униформа и традиционални мотиви во стилот „гжељ“. На рамениците имаше златни еполети, а наместо вообичаениот кокошник, главата ја красеше хусарско чако (тврда, висока воена капа).

Вера Красова и гжељ, 2008.

Националната носија на Вера беше модерна интерпретација на рускиот народен стил - фустан со орнаменти во стилот на „гжељ“, украсен со природни бисери и ѕвонести широки ракави.

Татјана Котова и уште една „Принцеза-лебед“, 2007.

Ликот на „Принцезата-лебед“ првпат се појави на натпреварувањето уште во 2007 година, а го претстави Татјана Котова. Овој костим ја доби наградата на публиката.

Ана Литвинова и хохлома, 2006.

Дизајнерите на националната носија за Литвинова се осмелија да ги комбинираат павлопосадските шари со сликарството во стилот хохлома. Препознатливиот костим е украсен со чисто злато, поради што целиот костим тежеше над шест килограми.