Како помина ЕУРО 2020 во Санкт Петербург (ФОТОГРАФИИ)

Задоволни странци во капи со рокчиња и маички во боја на белгиското знаме го напуштаат аеродромот „Пулково“ - така почна денот на првиот натпревар меѓу Русија и Белгија во рамките на првенството ЕУРО 2020.

Русија отвори безвизен режим за носителите на навивачкиот пасош FAN-ID за да можат странските навивачи да ги посетат натпреварите на саканите тимови. По пристигнувањето, навивачите го заменуваа електронскиот документ со физичка картичка во специјален центар во Санкт Петербург.

Автобусите и излозите на продавниците и кафе-баровите во градот беа украсени со симболите на ЕУРО 2020. Во една улица беа поставени 24 мачки „навивачки“ во боите на репрезентациите кои учествуваа на шампионатот. Овој уметнички објект го поставија уметниците на креативното здружение „Митки“.

Специјално за навивачите во Москва и Санкт Петербург беа уредени неколку фан-зони каде навивачите можеа да ги следат преносите на натпреварите, а покрај тоа во посебни фото-зони да направат и фотографии за спомен, да учествуваат во улични перформанси или да играат мини-фудбал.

Едно од најпопуларните места за фотографирање во петербуршката фан-зона на плоштадот „Коњушенаја“ беше уметничката инсталација на познатиот руски уметник, калиграфот Покрас Лампас. Арт-објектот се состои од 432 топки во кои се шифрирани зборови како што се пријателство, еднаквост, здравје, мир, победа и чест. По затворањето на инсталацијата, нејзината дигитализирана верзија ќе биде достапна во вид на NFT токен. Токенот ќе го добие стрелецот на најдобриот гол на првенството, а холограмот на наградата ќе биде изложен во седиштето на УЕФА.

Руски и странски навивачи вечерта на 12 јуни ги наполнија навивачките зони и спортските барови.

Белгијците се радуваа на секој постигнат гол, додека руските навивачи беа разочарани.

Русија загуби од Белгија со резултат 3:0.

Голем број навивачи се собраа во Санкт Петербург на 14 јуни да го гледаат натпреварот Полска - Словачка (1: 2). На стадионот „Гаспром-Арена“ имаше над 12000 гледачи.

Фан-зоната Евро-2020 на плоштадот „Коњушенаја“ во Петербург беше преполна на 16 јуни, за време на натпреварот помеѓу Русија и Финска. Во неа истовремено се наоѓаа 5000 луѓе.

Русија ја победи Финска, постигнувајќи еден гол.

Еден од најубавите ликови на ЕУРО 2020 беше студентката Марија Шумилина. На натпреварот Финска - Белгија (0:2) таа истрча на теренот во шорцеви и костим за капење на кој беше испишан назив на криптовалута. Таа дотрча речиси до средината на теренот, каде припадници на обезбедувањето ја задржаа и ја одведоа од теренот, по што играта продолжи.

Во Санкт Петербург беа воведени нови ограничувања во врска со порастот на бројот на заболени од коронавирус. Тие се однесуваа и на навивачите. Конкретно, од 17 јуни во навивачките зони беше забранета продажба на храна, а од 20 јуни забрането во навивачката зона на плоштадот „Коњушенаја“ да има повеќе од 3000 навивачи.  

Фан-зоната во Москва исто така беше затворена поради ширењето на коронавирусот. Повторно беше отворена на 26 јуни, но можеа да влезат само оние прележале коронавирус, кои се вакцинирани или имаат негативен тест што важи три дена.

И покрај ограничувањата, во Санкт Петербург на 2 јули беше отворена уште една навивачка зона на Дворцовиот плоштад. Во центарот на градот беше запрен сообраќајот поради прикажувањето на три натпревари во еден ден (осминафиналето Англија-Германија, четвртфиналето Шведска – Украина и четвртфиналето Шпанија – Швајцарија) на стадионот „Санкт Петербург“.

Од 12 јуни над 110000 руски и странски навивачи го посетија Санкт Петербург.