Во Москва од 1973 година немало толку снег! Погледнете како изгледа тоа (ФОТО)

Во Москва ноќта меѓу четвртокот, 11 февруари, и петокот, 12 февруари, започна веавица што траеше три дена. Толку снег во рускиот главен град не паднало од 1973 година. Снежната покривка достигна 59 сантиметри, што значи дека за постигнување на апсолутниот рекорд недостигаше само еден сантиметар.

Таму каде што имаше паркирани автомобили утрината се гледаа само купишта снег. Возачите најпрвин мораа да си ја најдат својата кола да ја ископаат од снегот, а потоа да си ископаат себеси премин за да го напуштат дворот. Комуналните служби уште од утрото не беа подготвени за толкава количина врнежи.

Властите на Москва веќе соопштија дека за целосно расчистување ќе бидат потребни осум дена.

Висината на некои навеви во дворовите двојно надминува човечки раст. Тротоарите на некои места беа повторно покриени со снег буквално пет минути откако таму помина машина за чистење. 

Таму каде што обично се гледаа детски лулашки и рингишпили, сега ѕиркаа само нивните врвови.  

На некои куќи снегот речиси целосно ги покри прозорците. „Ми требаше еден час да го исчистам целиот тој снег од прозорците. Имаше околу... 30 сантиметри снег“, напиша една московјанка на „Твитер“.

Во центарот на главниот град ситуацијата не беше ништо подобра. Поради чистењето на главните улици се издигнаа купишта снег високи колку еднокатници.

Некои мораа да ги остават автомобилите и да тргнат пеш на работа, за да не стојат заглавени во колоните возила што се протегаа повеќе километри. „Јандекс“ ги оцени сообраќајните метежи со максимални 10 бодови.  

И воздушниот сообраќај беше парализиран: десетици летови беа откажани или доцнеа. Патниците чекаа со часови.  

„Затоа пак е преубаво!“, се согласуваат многумина. Во текот на целиот викенд улиците затрупани со снег беа омиленото место за фотографирање.