Како изгледа Москва во пресрет на Нова година и Божик

Годинава лизгалиштата во Москва поради пандемијата се отворија подоцна од обично и со одредени ограничувања. Меѓутоа, граѓаните и посетителите на градот нема да останат без својата омилена зимска забава.

Годинава ќе бидат отворени околу 1500 лизгалишта, вклучувајќи ги и оние познатите во паркот „Горки“ и ВДНХ, како и оние помалите на простори надвор од центарот од градот. Сите се различно украсени.

Едно од најголемите лизгалишта во Москва, она во ВДНХ, годинава е украсено на тема Антарктик во чест на 200-годишнината од откривањето на овој континент. Насекаде има пингвини!

Лизгалиштето во паркот „Горки“ го носи името „Навигатор“ и тематизира пет руски „чуда“: светилникот Мурманск, планината Елбрус, Златниот мост во Владивосток и дворецот Ластовичкино гнездо на Крим. Тука има и многу штандови со храна, каде посетителите можат да се окрепат по лизгањето!

Лизгалиштето во близина на ГУМ на Црвениот плоштад за посетителите подготви забава со песни од познати советски филмови и цртани.

Влезниците можат да се купат само на интернет, а вообичаените физички билетарници оваа сезона нема да работат.

На бесплатните лизгалишта посетителите можат да влезат само со QR-код кој можат да го преземат на интернет. Ако на мразот има премногу луѓе, управата привремено ќе го затвори влезот.

Московските лизгалишта се отворени секој работен ден од 10 до 22 часот, а во викенд до 23 часот.

Целиот инвентар се дезинфицира. Посетителите внатре во гардеробите ќе мораат да носат маски и ракавици.

Луѓе со висока температура нема да можат да влезат на лизгалиште. Додека се на лизгалиште, посетителите нема да мораат да носат маски.