Архитектонското ателје на познатата Заха Хадид ќе дизајнира нова метро-станица во Москва

Архитектонското ателје на реномираната уметница Заха Хадид го доби тендерот за проектирање на станица на московското метро на новата Голема кружна линија, која во моментов е во изградба.

Градоначалникот на Москва Сергеј Собјанин најави дека работниот назив на станицата ќе биде „Кленов булевар 2“ и дека ќе се појави до 2023 година во јужниот дел на градот, покрај паркот на музејот Коломенское.

Горниот хол на станицата ќе има проѕирна конструкција со многу природна светлина. „Станицата ќе биде проѕирна и елегантна. Нејзиниот клучен елемент ќе биде светлината, која во нашата клима никогаш ја нема доволно“, додаде Собјанин.