Запознајте ја новата ѕвезда на уметничкото лизгање: Аљона Косторнаја со нов светски рекорд (ФОТО)

Во Русија нови таленти за уметничко лизгање се појавуваат од година во година. На Олимписките игри 2014 година светот ја откри Јулија Липницкаја, на Олимписките игри во 2018 година најмногу одличја однесоа Алина Загитова и Евгенија Медведева. Сите три девојки се ученички на Етери Тутбериѕе, една од најуспешните тренери во овој спорт која од претседателот Путин дури доби и Орден на честа.

Но, оваа година се појави нова, уште помлада ѕвезда, исто така од тимот на Тутбериѕе. Сега е Аљона Косторнаја таа која собира успеси и руши рекорди.

Аљона потекнува од спортско семејство. Татко ѝ се занимаваше со атлетика, а нејзината мајка исто така тренираше уметничко лизгање. Тие ја запишаа Аљона на уметничко лизгање на 4-годишна возраст и, според нивните зборови, таа на почетокот не била особено заинтересирана за спорт.

Родителите, сепак, не се откажаа и Аљона успеа да ги совлада првите скокови. Тогаш почна да му се радува на уметничкото лизгање. Во 2016 година го смени тренерот и премина кај Тутбериѕе. Една од причините беше тоа што Тутбериѕе беше позната по тоа што нејзините штитеници задолжително се искачуваат на подиумот. А тоа беше сонот на Аљона.

Косторнаја го освои својот прв златен медал во сезоната 2017-2018, кога ја однесе победата на јуниорското натпреварување во Полска. Така доби можност да учествува во јуниорското Гран-при финале во Јапонија, каде што го освои среброто.

Во истата сезона успешно учествуваше на руските национални натпревари. Го освои второто место на јуниорското првенство. Потоа, на своето прво сениорско натпреварување ја освои бронзата, а на следното сериозно сениорско натпреварување, Купот во уметничко лизгање, дојде и до златото.

Во следната сезона 2018-2019, победи во две етапи на Гран-прито, но во финалето стигна само до бронза. Најновиот успех го постигна на Гран-при натпреварувањето 2019-2020 година.

Во етапата на Гран-прито во Јапонија (трофеј NHK), Аљона падна на пробата, но во настапот го освои златото и постави неколку лични рекорди, како и светски рекорд во кратка програма (85,04).