Репрезентацијата на Сенегал за многумина неочекувано ја победи Полска со резултат 2:1 во првиот натпревар од групната фаза на Светското првенство во фудбал. На социјалните мрежи се појави една ништо помалку неочекувана видеоснимка на која навивачите од оваа африканска земја ги чистат зад себе (и не само зад себе) трибините на стадионот „Спартак“ во Москва.
Тоа е најдоброто што го видовте денеска, беше еден од коментарите на социјалните мрежи.
Нешто слично направија и навивачите на репрезентацијата на Јапонија по победата над Колумбија (2:1) на „Мордовија Арената“ во Саранск.