Како да направите дома освежителен руски квас (РЕЦЕПТ)

• Ве очекуваме на Телеграм-каналот https://t.me/rb_makedonija
• Вклучете го во пребарувачот „Show notifications“ (дозволи известувања) за нашиот сајт!
• Пријавете се на нашата неделна мејлинг листа

Ферментацијата е она што го издвојува квасот од другите пијалаци и го прави не само вкусен пијалак, туку и нешто што го поддржува здравјето. Неговите главни состојки се слад, 'ржано брашно или трошки од 'ржан леб. Сувото грозје се користи за започнување на процесот на ферментација, бидејќи содржи квасец.

Квасот го поддржува функционирањето на дигестивниот тракт и го спречува ширењето на штетните и патогени микроорганизми. Исто така, го подобрува метаболизмот и придонесува за правилно функционирање на кардиоваскуларниот систем.

Од Средниот век, кога квасот за прв пат се споменува во хрониките од X век, обожавателите на овој суштински руски пијалак верувале дека го зајакнува и го закрепнува телото. Подоцна, во современото доба, научниците открија дека квасот го постигнува овој ефект благодарение на „добрите“ и корисни пробиотски бактерии.

Денес квас може да се најде во сите продавници во Русија, како и во специјализирани продавници со руски производи во странство. Но, првично тоа беше нешто што луѓето сами го подготвуваа дома. Доколку сакате да пробате како изгледа тоа, ќе бидете сигурни во квалитетот на употребените состојки кои сами ги набавувате.

Покрај тоа, можете да ја контролирате количината на шеќер. На пример, додавам различни количини шеќер за различни намени. Помалку шеќер додавам ако сакам квасот да се користи за подготовка на окрошка (ладна супа), а повеќе ако сакам посладок квас за пиење. Можете да му додадете и зачини, кора од лимон или бобинки по ваш избор. Сепак, јас претпочитам да ја подготвам класичната верзија.

Кога бев дете, баба ми сама подготвуваше квас во викендичката. Беше релативно едноставно, бидејќи во кујната секогаш имаше останато парчиња ‘ржан леб и по некој грст суво грозје. Ги прелеваше со вода, ги покриваше со газа и ги оставаше на топло место. Така почнуваше процесот на ферментација.

Ако ги имате сите потребни состојки, голема тегла и малку трпение, тогаш можете сами да си направите слабоалкохолен пијалак - целосно природен домашен квас.

Состојки за тегла од 2 литри: 

• Вода – 1,5 литри
• ‘Ржан леб - 150 g
• Шеќер - 80 g
• Суво грозје - 20 g
• Парче газа
• Тегла од 2 литри 

Начин на подготовка:

1. Исушете ги трошките ‘ржан леб во рерна. На 130℃ дваесетина минути.

2. Растворете го шеќерот во врела вода. Изладете додека водата не стане топла.

3. Во теглата ставете ги трошките од лебот и сувото грозје. Постојат различни мислења за тоа дали сувото грозје треба да се измие претходно. Некои веруваат дека подобро ферментира нзмиено, додека други тврдат дека треба малку да се измие и исуши пред употреба. Јас не го миев.

4. Наполнете ја теглата со вода.

5. Теглата покријте ја со газа и ставете ја на топло и темно место да отстои 3-4 дена.

6. За два-три дена ќе забележите дека процесот на ферментација започнал.

7. Процедете го квасот.

8. Сипете го во теглата, добро затворете и ставете ја во фрижидер.

Некои домаќинки советуваат затворената тегла со процедениот пијалак да се чува некое време на топло место со додавање на неколку црни суво грозје и шеќер за да се забрза процесот на ферментација.

Сервирајте го квас како освежителен пијалак или користете го за подготовка на ладна супа.