Тапанари од Африка: што купуваат на тендер руските владини институции

Getty Images
Во Русија избувна скандал околу прибор за јадење и ќебиња за сума од 5 милиони рубли ($ 88.850), кои блиската до државата нафтена компанија „Роснефт“ („Роснефть“) сакала да ги купи за својот хеликоптер.

Рускиот опозиционер Алексеј Наваљни, раководител на Фондот за борба против корупцијата (ФБК), на 22 мај се нафрли со остра критика против нафтената компанија „Роснефт“ (контролниот пакет акции во неа е во сопственост на државата). На сајтот на „Роснефт“ претходно беше поставен документ за купување „предмети за ентериерот на ќерка компанија РН Аерокрафт“ и според Наваљни наведените предмети се неоправдано скапи.

Војна со зборови околу чаши

Вкупната наведена цена на „предметите за ентериерот“ на хеликоптерот на „Роснефт“ е 5 милиони рубли ($ 88.850). На списокот има на пример чаши за вотка со цена 11 илјади рубли ($ 195) за едно парче или ќебиња по 124.000 рубли ($ 2.203). „Се луксузираат со раскош!“, револтиран е Наваљни и потсети дека егзистенцијалниот минимум во Русија во моментов е 9.889 рубли ($ 175).

Портпаролот на „Роснефт“ Михаил Леонтиев појасни во разговор со „Комерсант“ дека купувањето има и имиџен карактер: „да се склучи договори за милијарди, а во исто време да даваа храна во садови за еднократна употреба не е многу пристојно“. Леонтиев, познат по острите изјави, освен тоа претпостави дека самиот Наваљни тешко дека „јаде со раце и се брише со ракавот“.

Следниот ден РН Аерокрафт се откажа од купување - според официјалната информација давателот не сакал да ја намали цената на стоките. Леонтиев саркастично го покани Наваљни самиот тој да му продаде на „Роснефт“ „поевтини лажици и виљушки“.

Топ-листа на најчудните државни набавки

Патем, приборот за јадење и предмети за домаќинство, дури и најскапите, изгледаат како нешто нормално во споредба со она што може да се сретне на руските сајтови за јавни набавки, каде со закон се регистрираат сите тендери за набавки на државните структури. Некои нарачки предизвикаа сериозно негодување кај јавноста, а други едноставно изгледаат интересно.

1. Поправка на тоалет за $ 28.000

Во 2013 година администрацијата на Краснојарск (3.350 километри источно од Москва) се решава на поправка на еден од тоалетите во општината во стил на „неокласика“. „Посетителот на службениот тоалет треба насекаде да чувствува стил“, напиша тогаш регионалното издание „Сибновости“. Реновирањето на тоалетот во архитектонско ремек-дело требало да чини, според тендерот, 1.6 милиони рубли ($ 28.000), што предизвика незадоволство кај жителите на градот. На крајот градоначалникот на Краснојарск Едхам Акбулатов се откажа од скапата неокласика и тендерот беше поништен.

2. Тапанари од Бурунди во Сахалин

Чиновници од администрацијата на Сахалинската област (престолнина Јужносахалинск, 6.650 километри источно од Москва) решаваат да ја пречекаат со пикирам Новата 2010 година и да поканат петмина уметници-тапанари од африканската земја Бурунди на новогодишниот прием за талентирани млади. За да им купат авионски билети и да им резервираат пристоен хотел, биле потребни 340 000 рубли ($ 6.041). Тогашниот губернатор на Сахалин Александар Хорошавин не ја оправдува оваа егзотика и решава дека буџетските средства можат да се искористат за подобра намена. Тендерот е поништен. Стремежот кон штедење, патем, не го спасува самиот Хорошавин - во 2015 година го уапсат за добивање на поткуп од $ 5.6 милиони.

3. УСБ од малахит

Чувањето информации е важна работа за државните структури и во администрацијата на Свердловска област (престолнина Екатеринбург, 1.400 километри источно од Москва) и приоѓаат на оваа задача широкоградо. Во март 2015 година Министерството, на сајтот за јавни набавки објавува барање за купување на 40 мемориски стикови со обем на меморијата не помалку од 8 гигабајти, украсени со познатиот уралски минерал малахит, а исто така и за 40 комплети за пишување од јаспис. Износот на договорот е 244.500 илјади рубли ($ 4.344).

4. Префинети ручеци во Сибир

Во март 2015 година администрацијата на Новосибирската област (2.800 километри од Москва) објавува тендер за сервисирање на официјални приеми за вкупно 3 милиони рубли ($ 53.310). „Менито“ вклучува скапи јадења: јагнешки котлети, канапиња со црвен кавијар, виски кое не е помлад од 18 години и десерт со специјално приготвена портокалова шеќерна коричка. „Независимаја газета“ со иронија пишува дека голем дел од новосибирците дознале за неговото постоење од вестите за владиниот тендер. Случајот го привлекува вниманието на проектот „За чесни јавни набавки“ и по една недела губернаторот на областа Владимир Городецки го укинува тендерот и во исто време ја намалува својата плата и на останатите службеници.

5. Овца, мајмун и петел

Во будистичка Бурјатија (престолнина Улан Уде, 4.400 километри источно од Москва) се однесуваат сериозно кон празнувањето на источната Нова година. Во 2015 година администрацијата на Улан Уде на аукција порачува на една од зградите на градот да биде поставен симболот на годината според кинескиот календар - сина овца - за 600.000 рубли ($ 10.700). Луѓето не ја прифаќаат идејата - од Општествениот народен фронт (ОНФ) велат дека овие пари би можеле да се искористат за осветувањето на цела улица и овцата на крајот станува доста скромна. По една година, во 2016 година, апетитот на службениците се намалил и скулптурата Црвена мајмун се појавува во градот за 300.000 рубли ($ 5.350), но и овој пат печатот ја критикува идејата, опишувајќи ја како „расфрлање на парите на даночните обврзници“. Патем, и во 2017 година градот е украсен со нов симбол - огнен петел - за истите 300.000 рубли.

При користење на материјалите на Russia Beyond задолжителен е хиперлинк до изворот од кој е преземен материјалот.

Повеќе возбудливи стории и видеа на Фејсбук страницата на Russia Beyond-Македонија

Овој веб-сајт користи колачиња. Кликнете овде за да дознаете повеќе.

Прифати колачиња