Од љубов до омраза: Како Пикасо ја гледал својата сопруга Ољга

На почетокот таа е нежна и рафинирана млада дама, а потоа станува надреалистички монструм...

Се венчале наспроти револуцијата од 1917 година и официјално биле во брак сè до смртта на Ољга во 1955 година, иако Пикасо во меѓувреме имал многу други жени. Поминале заедно 17 години и добиле син. Ољга продолжила да му пишува писма на мажа си и по нивното разделување, па се зборува дека го прогонувала и него и неговите љубовници.

1. Ољга Хохлова, 1917 година

Пикасо и Ољга Хохлова се запознале благодарение на познатиот руски импресионист Сергеј Дјагилев. Таа била балерина на „Руските сезони“, а Пикасо како сценограф и како кореограф учествувал во балетот „Парада“.

2. Ољга Хохлова со „мантила“, 1917 година

На Шпанецот толку му се допаднала Русинката што ја следел на гостувањата низ Шпанија и го насликал еден од најпознатите портрети, Ољга со традиционални шпански украси за глава – мантила. За волја на вистината, Пикасо при својата работа користел обичен везен чаршав за на маса.

3. Портрет на Ољга во фотелја, 1917 година

Дјагилев му напомнал дека руските жени обично живеат во брак, така што Шпанецот jа запросил. Поради Ољга сликарот се оддалечил од кубизмот, а овој период од неговото творештво често се нарекува „неокласицизам“. И само поради тоа што неговата сопруга сакала портрети на кои можела да се препознае.

4. Портрет на Ољга Хохлова, 1918 година

Портретот на Ољга за 17 години од нивниот заеднички живот минал низ многу фази, па дури и нешто слично на иконопис.

5. Ољга во фотелја со книга, 1920 година

Поради својот сопруг Ољга го напуштила балетот, одбила да патува со „сезоните“ на Дјагилев во Латинска Америка. Малку подоцна повредила нога и најчесто го минувала времето во фотелја.

6. Замислената Ољга, 1923 година

Додека таа уживала во семејниот живот, во Русија се случила револуција и избувнала граѓанска војна. Три години Ољга не знаелa што се случило со нејзините родители, со браќата и со сестрите. Подоцна слушнала дека нејзиниот татко исчезнал без трага, дека едниот брат загинал, другиот избегал од земјата, а нејзината мајка и сестрите живеат во сиромаштија. Тогаш настанале портретите на тажната и замислена Ољга.

7. Мајчинство, 1921 година

Во февруари 1921 година Ољга го родила нивното единствено дете, синот Пол. Пикасо бил среќен и многу ја сликал својата сопруга со бебето во рацете како Богородица.

8. Танц, 1925 година

Односите помеѓу Ољга и Пикасо почнале да се расипуваат кон средината на дваесеттите години од минатиот век. Ољга била љубоморна, но имала причина за тоа. Особено ја повредило тоа што Пикасо повторно почнал да ги слика балерините од „руските сезони“ во Монте Карло, додека таа се откажала од својата кариера поради мажа си.

Критичарите сепак велат дека на сликата „Танц“ Пикасо ја насликал токму Ољга.

9. Женски акт во црвена фотелја, 1929 година

Кога започнала кризата во нивните односи, Пикасо сè помалку правел портрети на кои Ољга можела да се препознае. Тој не можел да ја поднесе нејзината љубомора и сè повеќе време минувал со нови музи.

10. Женска глава, Ољга Пикасо, 1935 година

Ољга и Пабло престанале да живеат заедно во 1935 година, но тој сепак наоѓал место на платната за ликот на својата сопруга.

При користење на материјалите на Russia Beyond задолжителен е хиперлинк до изворот од кој е преземен материјалот.

Повеќе возбудливи стории и видеа на Фејсбук страницата на Russia Beyond-Македонија

Овој веб-сајт користи колачиња. Кликнете овде за да дознаете повеќе.

Прифати колачиња