Руски научници направија човечки ембриони отпорни на вирусот ХИВ

Global Look Press
Ова е прв експеримент за модификација на гени на човечки ембриони во Русија. Научници од два московски института уфрлија мутација во генот кој е одговорен за спојување на вирусот ХИВ со рецепторот на површината на лимфоцитите.

Кога влегува во организмот ХИВ ги напаѓа лимфоцитите. Мал број на луѓе е имун на ХИВ, затоа што нивниот ген CCR5 има мутација поради која вирусот не може да стапи во врска со клетките.  

Во науката се познати случаи кога имунитетот на ХИВ се пренесувал од донаторот на примачот заедно со пресадена коскена срцевина. Но, имунитетот може да се создаде и со помош на генетска терапија која подразбира модификација на лимфоцитите на пациентот со помош на технологијата CRISPR.

Научниците од Истражувачкиот центар за акушерство, гинекологија и перинатологија „Кулаков” (МГУ) и Медицинскиот универзитет „Пирогов” одлучија да го модифицираат генот CCR5 во стадиум на ембрион. Сличен експеримент во 2016 година направија истражувачи од Кина, но мутацијата се прими само кај еден од дваесет ембриони.

Руските стручњаци се потпреа на искуството на своите кинески колеги, поработија на методологијата и успешно ги модифицираа ембрионите. Експериментот го вршеа на дефектни оплодени јајце клетки кои се добиени со вонтелесно оплодување, но не биле погодни за имплантација во матката. На крајот на експериментот потребната мутација ја имале пет од осум ембриони.

Во иднина развиената методологија ќе овозможи да се избегне заразување во стадиумот на ембрион. На пример, ќе го заштити детето на идната мајка која е носител на ХИВ инфекција.

Освен што може да ги менува клетките задолжени за имунитетот, технологијата CRISPR може и да ги отстрани од тие клетки гените на ХИВ, што овозможува речиси во целост да се блокира размножувањето на вирусот доколку навлезе во човечкиот организам.

Прочитајте повеќе: Новата руска вакцина против туберкулоза ќе се појави идната година

При користење на материјалите на Russia Beyond задолжителен е хиперлинк до изворот од кој е преземен материјалот.

Повеќе возбудливи стории и видеа на Фејсбук страницата на Russia Beyond-Македонија
Дознајте повеќе

Овој веб-сајт користи колачиња. Кликнете овде за да дознаете повеќе.

Прифати колачиња