Путин: Портфолиото на извоз на руско оружје надмина 56 милијарди долари

Обeмот на извозното портфолио на оружје првпат достигна такво ниво по 1992 година, истакна претседателот на РФ Владимир Путин.

Портфолиото на извозни нарачки на руско оружје и воена техника надмина 56 милијарди долари, што е за 26 милијарди долари повеќе од минатата година, соопшти претседателот на РФ Владимир Путин, пренесува ТАСС.

Според него, обемот на извозното портфолио на оружје и воена техника на Русија првпат од 1992 година достигна такво ниво.

Рускиот претседател изјави дека извозот на руското воено производство во 2015 година изнесувал 14,5 милијарди долари, што е повеќе од планираното.

Путин изјави дека „Русија го задржува второто место на листата светски лидери во испорака на воена техника и вооружување на глобалните пазари, при што, има голема празнина меѓу нас и земјите што следуваат по нас“.

Како што истакна Путин, воено-техничката соработка меѓу РФ и ЕУ практично не постои, што не одговара на интересите ниту на Русија, ниту на Европа.

„Речиси прекина воено-техничката соработка со европските држави. Би сакал да потенцирам – не по наша инцијатива, сметаме дека тоа е привремена појава“, изјави Путин на седницата на претседателската комисија за воено-техничка соработка со странските држави.

Тој изрази увереност дека е во интерес на сите земји на европскиот континент да се воспостави отворена, продуктивна соработка во сите сфери, вклучително и по линија на ВТС. „Несомнено тоа ќе ја зголеми довербата“, истакна претседателот.

 



 

Сите права ги задржува „Росијскаја Газета“.

Повеќе возбудливи стории и видеа на Фејсбук страницата на Russia Beyond-Македонија

Овој веб-сајт користи колачиња. Кликнете овде за да дознаете повеќе.

Прифати колачиња