Трагедија во Русија: Што се знае досега за падот на патничкиот авион Ан-148

Xinhua/Sputnik
Патничкиот авион Антонов-148 на руската авиокомпанија „Саратов ерлајнс“ се урна во неделата набрзо по полетувањето од аеродромот Домодедово во Москва кон Орск во Уралската област. Остатоци од леталото се забележани во близина на селото Степановское во Московската област, а од 65 патници и 6 члена на екипажот колку што ги имаше во авионот, не преживеа никој. Спасувачките екипи ја пронајдоа на местото на падот на авионот Ан-148 црната кутија и повеќе од 200 фрагменти на тела.

Руската компанија „Саратов ерлајнс“ ги приземји сите авиони Ан-148 и ги запре нивните летови по вчерашниот пад на таквото летало, соопшти денес прес-службата на таа компанија, прецизирајќи дека има шест такви авиони.

Во соопштението се наведува дека Ан-148, кој се урна вчера, во јануари оваа година ја поминал контролата и дека сите делови на моторите, каросеријата и крилата се темелно испитани и се истакнува дека пред полетувањето од Москва авионот вчера бил прегледан и не е утврден никаков недостаток.

Украинската државна компанија „Антонов“, која ги произведува и поправа авионите, соопшти дека е подготвена да ѝ се приклучи на истрагата за падот на авионот на руската авиокомпанија во Московската област.

Операцијата за пребарување на местото на падот на авионот, која продолжува под отежнати околности поради длабокиот снег, ќе трае околу една недела, изјавија официјалните лица. Остатоците од авионот се расфрлани на подрачје од најмалку 30 хектари. Распоредени се специјални сили на местото на падот на авионот - 900 луѓе и 100 единици опрема. Операцијата за пребарување во смени се одвива без престан.

Роднините на сите загинати се идентификувани и на домашните адреси им е дадена потребната помош, а во Москва и Орск за нив се резервирани хотелски соби. Во контакт со семејствата на жртвите е и тим од 29 психолози.

Процедурата за идентификување на остатоците на загинатите патници и членови на екипажот е во тек во Москва и Орск.

Истражителите денес зедоа примероци од горивото на урнатиот авион, изјави за руската агенција извор во регионалната влада, додавајќи дека се проверуваат сите организации поврзани со „Саратов Ерлајнс“.

Спасувачките екипи ја пронајдоа на местото на падот на авионот Ан-148 црната кутија и повеќе од 200 фрагменти на тела.

Авионот пред падот не горел и до експлозијата дошло во моментот на удар во земја, изјавија од Истражниот комитет на Руската Федерација.

 

При користење на материјалите на Russia Beyond задолжителен е хиперлинк до изворот од кој е преземен материјалот.

Дознајте повеќе