МНР РФ со коментар за заострувањето на ситуацијата во Македонија

Министерството за надворешни работи на Руската Федерација објави денеска коментар за ситуацијата во Република Македонија.
Зградата на Министерството за надворешни работи на Русија
Извор: Зградата на МНР РФ

Коментарот на Министерството за надворешни работи на Русија го пренесуваме во целост:

„Со загриженост констатираме дека политичката криза во Македонија, испровоцирана со грубо мешање однадвор во внатрешните работи на оваа земја, се продлабочува. На Македонците со активна помош на раководителите на ЕУ и НАТО се обидуваат да им наметнат „албанска платформа“, составена во Тирана во кабинетот на премиерот под картата на тнр. Голема Албанија, која ги илустрира територијалните претензии спрема  големи области на соседните Црна Гора, Србија, Македонија и Грција. Особено вознемирува што во оваа афера се најдоа вклучени и властите на еднострано прогласеното за независно Косово. Ја сметаме таквата линија за крајно опасна, која може да предизвика уништување на македонската државност и дестабилизација на Балканот во целина.

Би сакале да потсетиме дека одржаните во Македонија на 11 декември 2016 година на инсистирање на ЕУ и САД предвремени парламентарни избори беа одбележани со победа на владејачката партија на чело со Никола Груевски. Сега Западот преку албанското малцинство се обидува да ја донесе на власт во Скопје поразената опозиција која се потпиша на ултимативните барања на Албанците кои водат кон поткопување на уставните темели на земјата.

Континуираните деструктивни обиди за наметнување однадвор на шеми, спротивни на волјата на македонските гласачи, можат само да ја влошат ситуацијата. Потребно е да престане мешањето однадвор во внатрешните работи на Македонија, да се почитува правото на македонските граѓани самостојно да ја решаваат својата судбина во согласност со основните демократски принципи“, се вели во коментарот на рускиот дипломатски ресор.

Авторските права на материјалите се во сопственост на редакцијата. При објавувањето на материјали од порталот „Руска реч на македонски“ во друг медиум, задолжително треба да се постави активен линк кон страницата од која е преземен текстот.
+
Лајкнете нѐ на Фејсбук.