Напуштена и морничава: Ховринската болница која влева страв кај жителите на Москва

На почетокот на осумдесеттите години од минатиот век советската власт одлучи да изгради една од најголемите болници со 1.300 кревети.

Избран беше московскиот реон Ховрино кадешто тогаш немаше болница.

Некои велат дека проектот е сличен на корпорацијата Umbrella од видеоиграта Resident Evil.

Изградбата беше замрзната во 1985 година поради финансиски проблеми или поради погрешна конструкција на темелите (сè уште не се знае точно), а потоа целосно беше запрена.

Оттогаш љубителите на адреналинот ги истражуваат нејзините опасни ходници. 

Празната и напуштена конструкција на болницата изгледа мошне морничаво. Во врска со ова место се раскажуваат мошне необични легенди.

Во текот на деведесеттите години од минатиот век се ширеа приказни дека тука некоја сатанистичка секта ги извршува своите ритуали, и дека во подрумите убивала мачки и кучиња-талкачи, па дури и луѓе.

Наркоманите, пијаниците и бездомниците тука минуваа време и организираа нелегални собири. Често на подот можеа да се најдат многу шприцови и скршено стакло.

Оваа морничава сива грдотија често беше и место на многу самоубиства. Тука дури имаше и споменик на тинејџер кој се самоубил поради невозвратена љубов.

Трагачите по авантури, а потоа и инстаграмерите се собираа тука за да ги „истренираат“ своите нерви и да ја фотографираат навистина морничавата атмосфера.

И покрај чуварите на многумина им тргна од рака да минат низ оградата, но некои од нив се здобиваа со тешки повреди во темнината на опасните скали и во празните отвори за лифтови.

Љубителите на теориите на завери дури и тврдеа дека болницата има неколку подземни нивоа каде се наоѓаат тајни лаборатории.

Погледнете го ова видео исто така: Видео: Седум „гробници“ на советското минато

При користење на материјалите на Russia Beyond задолжителен е хиперлинк до изворот од кој е преземен материјалот.