Четири начини назима да ја прошетате Москва и да не смрзнете

10 јануари 2016

Кира Егорова

Извор: Shutterstock/Legion-Media

Москва е град со големи далечини и монументални зданија. Големината на мегалополисот ја истакнува неговата убавина, но го отежнува движењето низ него кога е студено. „Руска реч на македонски“ за посетителите на Москва одбра најдобри совети за тоа како да се згреете и да уживате во посетата на овој град во студените зимски услови.

1. Трамвај, метро и други пријатели на туристот

Извор: PhotoExpress

Јавниот превоз е извонреден начин да се обиколи Москва за помалку од еден долар. Постои еден билет за сите видови превоз: метро, автобус, трамвај и тролејбус. Едно возење чини само 0.7 долари.

На туристите од странство им се нудат многубројни екскурзии со автобус. Тие тргнуваат од Црвениот плоштад, траат околу 2.5 до 3 часа и чинат 10 до 15 долари. Маршрутата е направена така што автобусот се движи по историските улици и ретко кога излегуваат на магистралите со густ сообраќај.

2. Екскурзија со брод и светла на вода

Извор: TAСС/Сергеј Фадејчев

Речниот транспорт во Москва не запира ни назима. Туристичките јахти од затворен тип со греење и со прозорци со панорамски поглед на брегот се опремени со неопходниот прибор за кршење мраз. Маршрутата минува покрај главните знаменитости на стара и на советска Москва, од Сталиновите облакодери до Кремљ и Новодевичиј манастир. Доколку сакате, можете да излезете на палубата и да се фотографирате со одразите на ноќното осветлување на водата во позадина.

Екскурзијата трае 2.5 часа. Билетот за возење со јахта изнесува 10 долари, а уште толку ќе потрошите за комплетна вечера за едно лице во ресторан.

3. Релјефна архитектура и видици од височина

Извор: Ресторан „Бел зајак“

Москва се наоѓа во Источноевропската низина, една од најголемите рамнини на светот. Та не е позната по стрмните речни брегови и по ридестите патчиња, но сепак не остава впечаток на рамен, визуелно неинтересен град. Релјефот тука го создаваат згради со различни висини. Хармонијата на стаклени облакодери и еднокатни палати од времето на царска Русија создава илузија на шаренило и на нагло менување на висината.

Оваа слика може да се види од покривот на која било висока зграда. Ваквата слика ви ја откриваат и рестораните на покривите на московските многукатници.

За оние кои се сити од боршч и од пељмени, а кои сепак сакаат да ја видат Москва од птичја перспектива постои уште една варијанта. Посетете ги двата највисоки градски видиковци – Останкинската кула (висока 330 метри) и облакодерот во бизнис-центарот „Москва сити“ (висок 240 метри). Билетот и за двете места чини околу 15 долари.

4. Пруга над градот или уште еден необичен начин

Извор: Alamy/Legion-Media

Московската едношинска железница влегува во списокот најнеобични видови јавен превоз во Русија. Ова „метро во воздухот“ кое минува над патиштата и тротоарите беше отворено во 2004 година на североистокот од Москва. Линијата на едношинската железница опфаќа шест станици и се протега од метро-станицата ВДНХ до Тимирјазевскаја. Возењето по целата линија трае околу 20 минути.

Пругата е подигната на столбови високи 4 до 6 метри, така што од вагоните се гледа величествениот советски проект на изложбениот комплекс ВДНХ, линијата на железницата минува низ неговиот северен дел, на Музејот на космонаутиката, Останкинската кула и индустриските делови на северот на Москва. Билетот чини помалку од еден американски долар.

Сите права ги задржува „Росијскаја Газета“.

москва туризам