Русите работат на гасенична верзија на ПВО-системот „Панцир“ со зголемен дострел и ракети „Метка“

Во 2022 година ќе заврши работата над новата верзија на ракетно-топовскиот ПВО-систем „Панцир-СМ-СВ“ наменет за опремување на Копнените сили и ВДВ. Тој ќе биде монтиран на гасенична шасија и ќе има поголема зона на уништување на цели.

„Комплексот ќе користи два типа противвоздухопловни ракети“, изјави за веб-порталот „Краснаја звезда“ командантот на единиците на ПВО на руската армија генерал-потполковник Андреј Леонов.

Тој спомена уште два нови типа противвоздухопловни системи за единиците на Копнените сили чиј развој ќе заврши до крајот на 2022 година. Се работи за ПВО-системот „Птицелов“ кој ќе биде вооружен со два типа ракети. Една ќе се наведува со помош на ласерски зрак, додека другата ќе ја детектира топлотната рефлексија на целта. Покрај ПВО-системот „Птицелов“, единиците на Копнените сили ќе усвојат и специјална ПВО-верзија на оклопното возило „Тајфун-ПВО“. Тој ќе биде вооружен со ракети со краток дострел (системи „Игла“, „Игла-С“ и „Врба“), како и со новите ракети што се развиваат во рамките на проектот „Метка“.

Оваа ракета нема да има конкуренција во светот кога станува збор за квалитетот и способностите на нејзината оптоелектронска самонаведувана боева глава. Таа ќе овозможи уништување на воздушната цел, без оглед на различните методи за противелектронска борба што ги применуваат современите борбени летала.

При користење на материјалите на Russia Beyond задолжителен е хиперлинк до изворот од кој е преземен материјалот.