Како изгледа рускиот павилјон на светската изложба „Експо 2020“ во Дубаи (ФОТО)

Expo 2020 Russia
Најголемата светска изложба е отворена. Русија подготви нешто посебно за да ги импресионира посетителите.

Се очекува дека околу 25 милиони луѓе ќе го посетат „Експо 2020“ во Дубаи, првиот настан од ваков вид што ќе се одржи на Блискиот Исток и во Северна Африка. Толку луѓе ќе имаат можност да го посетат величествениот руски павилјон креиран во склад со главната тема на изложбата: „Креативен ум: Создавање иднина“.

Разнобојна купола со илјадници настани

Павилјонот е во вид на купола. Неговата надворешна обвивка е составена од безброј мали разнобојни цевчиња. Нивното испреплетување создава визуелен ефект на бесконечност и го симболизира вечниот процес на разбирање и спознавање на светот. Инсталацијата во павилјонот, реализирана од Simpateka Entertainment Group, го истражува мозокот, а мултимедијалната инсталација ја прикажува неговата структура и функционирање.

Павилјонот нуди и богата културна програма, вклучувајќи ги најдобрите оперски и балетски претстави, предавања, музејски презентации и часови по руски јазик. На фестивалот „Од Русија со ...“ ќе бидат прикажани најдобрите играни и анимирани филмови, перформанси и дела на дигиталната уметност.

Културните настани ги следи и интензивна деловна програма. Во руската купола експертите ќе разговараат за низа теми, вклучувајќи ги вселената, иновативните технологии, урбаниот развој, е-трговијата, земјоделството, образованието, како и медицината и здравството.  

Концептот зад агендата

Кога станува збор за креаторите и пронаоѓачите, Русија отсекогаш била на врвот: писателот Лав Толстој, хемичарот Дмитриј Менделеев, ракетниот стручњак Сергеј Корољов, да наведеме само неколкума. Пред сто години, Русија беше во епицентарот на светското внимание, поврзувајќи ги најпрогресивните креативни сфери: „Руските сезони“ на Сергеј Дјагилев, авангардната уметност на Михаил Ларионов и Казимир Малевич, театарскиот метод на Станиславски и уште многу други нешта. Денес, голем дел од рускиот пазар сé уште го сочинува креативната сфера, особено во Москва и Санкт Петербург.

Рускиот павилјон на изложбата во Дубаи има за цел да ја раскаже приказната за сите руски креативни и научни иновации од минатото. А во исто време да покаже што е ново во Русија на ова поле и како модерните руски креативни умови ја создаваат иднината.

 

При користење на материјалите на Russia Beyond задолжителен е хиперлинк до изворот од кој е преземен материјалот.

Овој веб-сајт користи колачиња. Кликнете овде за да дознаете повеќе.

Прифати колачиња