Како Русија го доби меѓународниот повикувачки број 007

Меѓународниот повикувачки број, како и многу нешта во современа Русија, е наследен од Советскиот Сојуз.

Меѓународната унија за телекомуникации (ITU), која припаѓа на ООН, во 1960 година создаде мрежа на телефонски кодови. Бројот 1 им беше доделен на САД и Канада, бројот 2 на Африка, 3 и 4 на Европа итн. Советскиот Сојуз беше единствената земја која доби свој ексклузивен број и тоа беше седмица.

Карта на светот со распоред на повикувачките броеви на сите држави.

Maximilian Dörrbecker (CC BY-SA 2.0)

По распадот на Советскиот Сојуз, Русија „наследи“ многу работи (па и многу проблеми) од СССР. Токму Русија во текот на 1990-тите го задржа телефонскиот код, иако го сподели со Казахстан, кој исто така е поранешна советска република. Другите држави, настанати со распадот на СССР, го добија европскиот број 3 или централноазискиот број 9.

Подоцна, на рускиот број 7 му се придружија и делумно признатите држави Абхазија и Јужна Осетија (претходно тие го користеа грузискиот број 9).

Ако сакате да телефонирате некому во Русија, најпрвин треба да внесете 007 (или +7, но ITU препорачува да се користи 00), а потоа бројот на мобилниот телефон. Ако ѕвоните на фиксен телефон, тогаш внесете 007, потоа повикувачкиот број на конкретниот регион на Русија (на пример, 495, 498 или 499 за Москва) и дури потоа внесете го бројот на телефонот.

Сè на сè, бројот ќе изгледа вака: +7 ABC xxx-xx-xx, каде ABC е повикувачкиот број на регионот. (На сајтот на ITU  се достапни сите броеви, како и детален опис на процесот на телефонскиот повик).

Интересно е што во границите на Русија се користи префиксот 8, и тоа без 00 или + на почетокот. По осмицата исто така следува повикувачкиот број за регионот и конкретниот телефонски број.

Во Советскиот Сојуз, повикувачкиот број 07 се користеше како кратка варијанта за нарачување меѓународен телефонски повик. Операторот одговараше на тој број и потоа го проследуваше повикот. Поетот и кантавтор Владимир Висоцки дури напиша и песна наречена „07“. Во своите чести патувања по Русија, тој се обидуваше да телефонира дома во Москва од најоддалечените региони, така што секој ден повикуваше 07 и разговараше со операторите во телефонската централа.

Дали некогаш сте имале проблеми да телефонирате во Русија? Споделете го со нас вашето искуство во коментарите под текстот.

При користење на материјалите на Russia Beyond задолжителен е хиперлинк до изворот од кој е преземен материјалот.