Руските конструктори интензивно работат на нова генерација „хај-тек“ шлемови за пилотите на Су-57

Anna Zvereva / Flickr
Овој систем овозможува прикажување на податоците на визирот на пилотскиот шлем во вид на дигитални цели (зафаќање на цел), како и на известувања за достапниот арсенал за нивно уништување, потоа детален приказ на информациите што му се неопходни на пилотот, а исто така и видеоприказ на просторот зад леталото што го обезбедуваат телевизиски и термовизиски сензори.

Пилотскиот шлем со интегрирани системи, кои имаат функција да создадат кај пилотот чувство на проширена реалност, се наоѓа во фаза на интензивни тестирања. Нивната основна функција е техничка помош на пилотите на руските ловци од петтата генерација Су-57 при управување со леталото, како и со системите на оружје. Ова за веб-порталот ТАСС беше кажано во информативната служба на Обединетата воздухопловна компанија (дел од државната корпорација „Ростех“).

„Во овој момент изведуваме тестирања на системот за нишанење и индикација кој е интегриран на шлемот на пилотот кој ќе управува со повеќенаменските авиони-ловци од петтата генерација Су-57. Овој систем овозможува прикажување на податоците на визирот на пилотскиот шлем во вид на дигитални цели (зафаќање на цел), како и на известувања за достапниот арсенал за нивно уништување, потоа детален приказ на информациите што му се неопходни на пилотот, а исто така и видеоприказ на просторот зад леталото што го обезбедуваат телевизиски и термовизиски сензори“, велат од Обединетата воздухопловна корпорација.

На овој начин пилотот е во состојба да го набљудува и просторот зад себе во услови на ограничена оптичка видливост (ноќ, временски услови). Ова е многу важно за него при изведувањето комплицирани маневри каде што е во можност да го види просторот околу себе, практично од сите агли.

Су-57 е руски повеќенаменски борбен авион од петтата генерација што го имаат развиени воздухопловните инженери на ОКБ „Сухој“. Тој е наменет за извршување огромен спектар задачи што можат да се постават пред една воздухопловна борбена платформа, како што е остварување на апсолутна воздушна превласт над територијата на која се изведуваат кривни борбени дејствија, уништување на најразлични копнени цели и површински бродови кои се зајакнати со современи противвоздушни борбени средства, операции за извидување и за надзор на воздушниот простор на голема оддалеченост, уништување на командна инфраструктура на непријателот итн.

Треба да се додаде и дека посебно внимание на руските воени конструктори е насочено кон изградбата на напредно ракетно вооружување од класата „воздух-воздух“ кое ќе му обезбеди на ова летало остварување доминација во воздушниот простор. Тоа пред сé се однесува на развојот на супераманеварбилните ракети со краток и среден дострел (Р-73/РВВ МД и  К-77М/РВВ АЕ), но и на ракетите со голем дострел за напад на цели на далечини над 300 км, како што е Р-37М. Покрај реконфигурацијата на нивните габарити и дизајн, особено внимание му е посветено на развојот на нова генерација ултраотпорни (на средства за противелектронска борба – заб. на прев.) самонаведувачки боеви глави со висока сензибилност.

Според информациите на руското Министерство за наука, до крајот на 2024 година руските Воздушно-космички сили (ВКС) ќе воведат во оперативна употреба 22 ловци од овој тип (две комплетирани ескадрили), додека до крајот на 2028 година тој број ќе порасне на вкупно 76 летала.

При користење на материјалите на Russia Beyond задолжителен е хиперлинк до изворот од кој е преземен материјалот.

Овој веб-сајт користи колачиња. Кликнете овде за да дознаете повеќе.

Прифати колачиња