Спектакуларна фотографија на нуклеарниот мразокршач „Тајмир“ среде ледена недојдија

10 јануари 2021

RUSSIA BEYOND - МАКЕДОНИЈА

Слободан Ѓукиќ

На фотографијата се гледа нуклеарниот мразокршач „Тајмир“ („Таймыр“) кој во доцните часови крши мраз на температури кои знаат да се спуштат на -50 степени Целзиусови. Се работи за пловило кое за потребите на СССР е направено во финското бродоградилиште „Вартсила“ (Wärtsilä). Благодарение на големата тежина и моќниот погон, овој брод може да пресече ледена плоча со дебелина од два метра.

„Тајмир“ спаѓа во категоријата нуклеарни мразокршачи наменети за обезбедување на пловидбата по сибирските реки кои во зимскиот период знаат да бидат оковани со мраз. Бродот е проектиран да има помал газ од вообичаено, затоа што тоа е неопходно за безбедна пловидба во речните корита (помала длабочина отколку во морињата и океаните). Своето име го доби во чест на парниот мразокршач „Тајмир“, направен на почетокот на 20 век.

Корпусот на бродот е направен кон крајот на 80-тите години на минатиот век во пристаништето „Вартсила“ во Хелсинки, Финска, по нарачка од СССР. Меѓутоа, неговата опрема (погонот направен врз основа на нуклеарниот реактор КЛТ-40М, како и останатите системи) беа од советско производство. Исто така, и челикот од кој е направен бродот е од советско потекло. Погонската единица врз база на нуклеарен реактор е направена во тогашен Ленинград, додека телото на мразокршачот од финското пристаниште со помош на тегнач е отшлепано 1988 година.

Што се однесува до погонската единица, таа можеше да генерира сила од околу 50 илјади коњски сили. Благодарение на овој податок, како и на тежината на бродот, „Тајмир“ можеше да крши мраз со дебелина и до два метра. При кршење на мраз со дебелина 1,75-1,80 метри бродот можеше да се движи со брзина од 2 јазли. Мразокршачот можеше да ссе користи на температури и од -50 степени Целзиусови.

Изградбата на нуклеарниот мразокршач „Тајмир“ беше важна пресвртница во соработката меѓу СССР и Финска. Наскоро беше направен и вториот брод од оваа класа „Вајгач“.

Тактичко-технички карактеристики на нуклеарниот мразокршач „Тајмир“

Пловилото спаѓа во категоријата нуклеарни мразокршачи од класата KM(★) ЛЛ2[2] А. Спаѓа во рамките на компанијата ФГУП „Атомфлот“ на државната корпорација „Росатом“. Бродот е воведен во експлоатација на 30 јуни 1989 година. Неговиот депласман изнесува 20 илјади тони. Должината на бродот е 151,8 метри, ширината 29,2 метри и висината 15,2 метри. Газот му достигнува 8,2 метри.

Пловилото го движи атомска турбоелектрична погонска единица (два турбогенератори ГТА 6421-ОМ5) со вкупна моќност од 36800 киловати (2 х 18400). Оваа сила се пренесува преку три пропелери кои можат да му обезбедат на бродот брзина до 18,5 јазли (33,3 км/час).

При користење на материјалите на Russia Beyond задолжителен е хиперлинк до изворот од кој е преземен материјалот.

мразокршачи