Легендарниот советски Т-55 и понатаму најпопуларен тенк во Африка

Конструиран кон средината на 50-тите години на минатиот век, советскиот среден тенк Т-55 и денес е најзастапеното возило од оваа класа на африканскиот континент.

Денес оваа техника, произведена во СССР, како и во Полска и во Чехословачка врз основа на лиценца, и понатаму се користи во повеќе од 25 земји. Според различни процени, во функција се најмалку 2500 тенкови од овој тип.

Најголемиот возен парк го има Египет со преку 800 „педесет и петки“. Познато е дека оваа земја повеќе пати се обиде да спроведе нивна модернизација, како самостојно, така и со помош на западните партнери.

На пример, Германците предлагаа да се зголеми нивната огнена моќ со поставување топ со калибар 105 милиметри, дополнителни оклопи и помоќен мотор. Исто така, требаше да бидат заменети и нишаните. Поради повеќе причини, пред сé поради високите цени, овој проект не се оствари. Иако дел од возилата сепак доби нови топови и средства за комуникација. Подоцна беше зајакната и нивната заштита.  

Алжирската војска продолжува да ги користи 270 тенкови Т-55МВ со „реактивен оклопˮ „Контактˮ.

Либиска Џамахирија за време на Моамер Гадафи набави 2200 примероци Т-55. До денес тенковите кои ги преживеаја борбите во граѓанската војна ги користат како единиците на Владата на национално единство, така и нивните спротивставени сили на фелдмаршалот Хафтар. Вториве неодамна одржаа маневри со учество на овие тенкови.

Т-55 војуваа во Ангола, Конго, Мозамбик, Нигерија, Чад и Етиопија. Интересно е што некои земји имаат само по неколку примероци на тенкот од овој тип, на пример, во Централноафриканската Република има четири, во Екваторијална Гвинеја три, во Того два, а во Лесото само еден тенк.

Со оглед на ситуацијата во Африка, може да се претпостави дека оваа техника ќе остане во состав на вооружувањето уште многу години.

 

При користење на материјалите на Russia Beyond задолжителен е хиперлинк до изворот од кој е преземен материјалот.

Овој веб-сајт користи колачиња. Кликнете овде за да дознаете повеќе.

Прифати колачиња