ВИДЕО: Руската компанија КамАЗ го тестираше автономниот шлепер „Челнок“

Компанијата КамАЗ на својот канал на „Јутјуб“ објави снимка на која се претставени можностите на автономниот товарен камион „Челнок“. Главната карактеристика на руското автономно превозно средство е немањето кабина за возачот.

Моделот 3373 „Челнокˮ е првото комерцијално автономно возило во Русија за кое е издаден патент. Шлеперот е долг 8 метри, широк 2,5 метри и висок 4 метри. Според овие карактеристики може да се спореди со моделот со средна носивост КамАЗ 4308, со тоа што автономниот камион нема никаква кабина, што значително ја намалува неговата цена и овозможува повеќе корисен простор во возилото.

При сопствена тежина од 8000 килограми, „Челнок“ може да повезе до 10 тони полезен товар. Притоа тој нема преден и заден дел и може да се движи во кој било правец. Благодарение на тоа што сите тркала на возилото се погонски, шлеперот може да се сврти на мал простор, како и да се движи дијагонално во таканаречениот режим на „рак“.

„Челнокˮ има синхрон електромотор со постојани магнети и батерија од 60 киловат-часови. Максималната брзина му е 40 километри на час, а со полна батерија може да помина до 50 километри. Според инженерите, со оглед на тоа дека автономното превозно средство е наменето за затворени простори на фабрики за автомобили, овие карактеристики се доволни за извршување на поставените задачи.

При користење на материјалите на Russia Beyond задолжителен е хиперлинк до изворот од кој е преземен материјалот.