Дали извозната верзија на системот „Бук-М3“ ќе се изедначи со ПВО/ПРО-системот С-300В „Гладијатор“?

Ракетен ПВО-систем со среден дострел 9К317М „Бук-М3“

Слободан Ѓукиќ
Руските конструктори ја унапредија извозната верзија на ПВО-системот 9К317Э „Викинг“ со интегрирање на ракети со долг дострел 9М83МЭ кои се наоѓаат во вооружувањето на ПВО/ПРО-системот С-300В. Ова овозможи ракетниот систем „Викинг“ да добие можности да уништува воздушни објекти на далечини над 100 км.

Рускиот систем за противвоздухопловна одбрана 9К317Э „Викинг“ претставува извозна верзија на ракетниот систем „Бук-М3“ што неодамна беше претставен пред пошироката публика. Тој е еден од најновите производи на руската воена индустрија и со самото тоа спаѓа во категоријата на најдобрите системи за ПВО што моментно се произведуваат во светот.

Меѓутоа, и покрај навистина одличните карактеристики на овој систем, неговите конструктори не стојат во место, туку постојано го надградуваат секогаш кога е можно. Така, на Меѓународниот воено-технички саем „Армија-2019“ беше претставена ракетната единица 9А383Э. Таа е наменета за транспорт и лансирање на противвоздухопловни ракети 9М83МЭ кои се користат на ракетните системи со долг дострел С-300В, пренесува интернет-порталот „Бог-рата“.

Лансирната единица е направена на унифицирана гасенична шасија која е слична со останатите елементи на кои се базира системот „Бук-М3/Викинг“. Според руските медиуми, благодарение на проширувањето на ракетниот арсенал со новата ракета 9М83МЭ, ефективниот дострел на системот во борба против аеродинамични цели (авиони на стратешка и тактичка авијација, беспилотни летала, хеликоптери и сл.) е зголемен на респектабилни 100 километри, со зона на уништување во висина која достигнува 30 км. Балистички цели може да пресретнува на далечини до 40 км и висина до 25 км.

При гаѓање на зафатената цел, симултано се лансираат две ракети, со што се обезбедува гарантирано уништување. Нивниот старт е сличен како и кај системот С-300, каде ракетата се лансира вертикално од контејнерот.

На лансирна единица 9А383Э може да се сместат до четири ракети 9М83МЭ. Скратена е и подготовката на ракетата за лансирање на 7,5 секунди, додека интервалот меѓу лансирањето на две ракети е 1,5 секунди. Вкупната тежина на лансирната единица на која се наоѓаат четири ракети 9М83МЭ достигнува 50 тони. Максималната брзина на движење е 60 км/ч, а возилото со полн резервоар може помине растојание до 500 км. Екипажот се состои од 2 војника.

При користење на материјалите на Russia Beyond задолжителен е хиперлинк до изворот од кој е преземен материјалот.

Повеќе возбудливи стории и видеа на Фејсбук страницата на Russia Beyond-Македонија

Овој веб-сајт користи колачиња. Кликнете овде за да дознаете повеќе.

Прифати колачиња