Таинствени морски сунѓери лекуваат рак

Alamy/Legion Media
Руските научници открија ново антиканцерогено средство. Тие за време на морските експедиции до брегот на Курилските Острови од далекоисточниот морски сунѓер екстрахираа соединение што ги уништува клетките на ракот, односно ги принудува самите да се уништат.

Научниците открија ново антиканцерогено соединение, Монанхоцидин А, во далекоисточните морски сунѓери Monanchora pulchra, кои живеат во северозападниот дел на Тихи Океан.

Ова соединение по своето дејство значително се разликува од веќе познатите антиканцерогени хемотераписки препарати. Тоа кај клетките на ракот предизвикува таканаречена автофагија, односно „самоварење“.

Овие истражувања се вршат во Тихоокеанскиот институт за биоорганска хемија „Бељаков“ (ТИБОХ) во Владивосток и во Лабораторијата за експериментална онкологија во германската клиника Епендорф во Хамбург.

„Ова е мошне редок механизам и ова соединение е едно од малобројните откритија од ваков вид“, вели за „Руска реч“ Валентин Стоник, член на Руската академија на науките и директор на ТИБОХ. „Откривме нов механизам, кој дава можност за создавање нови антиканцерогени препарати“.

Можностите на далекоисточниот морски сунѓер

Морските сунѓери и претходно беа познати како извор на моќни антиканцерогени агенси. На пример, научниците од универзитетот Лидс во Велика Британија во 2014 година успеаја од сунѓерот Halichondria okadai да добијат препарат против ракот на дојка. Ова средство не го лекува карциномот во целост, но за време на клиничките испитувања на 1.800 пациенти беше докажано дека им го продолжува животот на пациентите за пет месеци. Но, сега за првпат се испитани биолошки активните супстанции што ги содржи далекоисточниот сунѓер Monanchora pulchra.

„Нашиот институт со години се занимава со истражувања во Светскиот океан. Сега е во тек нашата 47 експедиција во подрачјето на Командорските и на Курилските Острови“, вели Стоник. „На самиот научноистражувачки брод ’Академик Опарин‘ се врши биолошко тестирање на собраните примероци, а, исто така, и фракција на екстрактите што се добиени од нив. Врз основа на ова се избираат објекти за понатамошно проучување. Во една од претходните експедиции овој морски сунѓер беше избран за истражување со цел од него да се добијат нови природни соединенија“.

Супстанцијата Монанхоцидин А е издвоена за време на експедицијата, а потоа во истражувања во лабораториите на овој институт се приклучила Татјана Макарева, доктор на хемиски науки. Таа ги истражува антиканцерогените својства на сунѓерот веќе повеќе од пет години.

Кога ќе се појават лековите?

Научниците сметаат дека е засега рано да се зборува за тоа во колкава мера Монанхоцидин А е поефикасен и посигурен од постојните препарати. За да се дознае тоа неопходно е да се извршат дополнителни фармаколошки истражувања. „Најдовме прототип за создавање нови лекови, односно издвоивме индивидуална супстанција, ја определивме нејзината структура и ги проучивме нејзините својства, а тоа е мошне сложена и долготрајна работа“, објаснува за „Руска реч“ Валентин Стоник. Сепак, веќе сега може да се каже дека ова откритие ќе овозможи создавање нова група антиканцерогени препарати.

Откритието на поморските научници покажа дека медицинската отпорност на клетките на ракот е проблем што може да се реши. Истражувањата се вршени на препаратот цисплатин, а тој е еден од најчесто користените во клиничката практика. Излезе дека Монанхоцидин А може да ги убие клетките на ракот што се отпорни на класичните медицински препарати.

Сега научниците ги планираат следните фази од истражувањето – се бараат начини за добивање нова супстанција во големи количества по пат на органска синтеза или со помош на биотехнологија. Освен тоа, неопходно е подетално да се проучат придружните дејства на овие соединенија врз човековиот организам, како и нивни други важни својства. Претходно истражувањата се вршеа само на определени линии на клетки на рак, а сега оваа супстанција треба да се тестира на животни.

„Ова засега е само почеток на патот, но тој ветува многу“, вели Валентин Стоник. „Сега сме во фаза која научниците ја нарекуваат ‘drug discovery’, што значи дека се појави идеја за создавање нов лек“.

Сите права ги задржува „Росијскаја Газета“.