„Блумберг“: САД ги анализираат способностите на РФ при нуклеарна војна

Разузнавањето на САД и Стратегиската команда на Вооружените сили на САД (STRATCOM) по барање на Конгресот вршат нова проценка на способноста на властите на Русија и Кина да „преживеат атомски напад“ и да продолжат да функционираат.

Според агенцијата „Блумберг“, експертите на САД го проучуваат потенцијалот на нуклеарните сили, вклучувајќи ги локациите и описите на копнените и подземните објекти кои се важни за политичките и воените раководства на двете земји, без оглед на тоа што претседателот Трамп сака да воспостави добри односи со нив.

Според информациите на изданието, канцеларијата на директорот за национално разузнавање и STRATCOM (која во теорија планира и реализира атомски напади) ќе ги оценат можностите на Русија и Кина по евентуален напад.

STRATCOM исто така ќе достави детален опис и за способноста на лидерите на РФ и Кина да преживеат атомски напад и да продолжат да раководат со земјите.

„Нашите експерти подготвуваат соодветен одговор“, изјави за „Блумберг“ портпаролот на STRATCOM Брук Де Волт, кој не сакаше да даде какви било детали.

Причината за процената е планот на американските власти за модернизација на нуклеарната тријада (стратешка авијација, интерконтиненталните балистички ракети и атомските подморници-носачи на ракети) која ќе чини 1 трилион долари и ќе почне на средината на 20-те години.

Овој план, предложен од администрацијата на поранешниот претседател на САД Барак Обама, е поддржан и од Републиканците, и од Демократите. 

Како што изјави истражувачот Брус Блер од Универзитетот Принстон, лидерите на Русија и Кина планираат да раководат со земјите од бункери кои се наоѓаат длабоко под земја или во планини.

Меѓутоа, за да можат САД да ги одвраќаат Русија и Кина, потребни им се и стратешки крстосувачки ракети кои ќе можат да нанесуваат удари врз бункери од секаков агол, смета Блер, пренесува РТ на руски.
 

 

При користење на материјалите на Russia Beyond задолжителен е хиперлинк до изворот од кој е преземен материјалот.